אין אסאך שטעט דארף מען פארן פינף שעות צו אנקומען צו די נאנטסטע מקוה; א נייע פראגראם צילט דאס צו טוישן

אידישע פאמיליעס אין לאבאק, טעקסאס, וועלכע ברויכן אנקומען צו א מקוה טהרה, דארפן היינט צוטאגס דרייוון ארום פינף שעות צו די נאנטסטע מקוה. אבער א נייע פאנד וואס איז געמאלדן געווארן ביי די גרעסטע אידישע קאנפערענץ, גייט ארויסהעלפן די לאקאלע קאמיוניטיס צו בויען אייגענע מקוואות. די "קרן השלוחים" פאנד האט געמאלדן ביים אינטערנאציאנאלן כינוס השלוחים אז זיי וועלן טיילן גרענטס פאר 22 קאמיוניטיס אין 9 לענדער איבער די וועלט.

דרוקט דא צו זען די ליסטע פון די נייע מקוואות וואס באקומען די פאנדן

דער כינוס השלוחים איז די גרעסטע צוזאמקום פון אידישע פירער איבער די וועלט. די ארום 6,500 באטייליגטע פון 110 לענדער טוען דארט אדורכרעדן די מצב אויפ'ן פעלד און זוכן אינאיינעם לעזונגען צו די גרעסטע טשעלענדזשעס וואס פלאגן דאס אידישקייט איבער די וועלט. דער כינוס דינט אלס א פלאטפארמע פאר נייע איניציאטיוון, און דאס יאר איז איינע פון די סאמע וויכטיגסטע טעמעס געווען די נויט פאר מקוה אינפראסטרוקטור און צוטריטליכקייט.

אלס רעזולטאט, האט די צענטראלע חב"ד העדקווארטערס, אנגעפירט דורך הרב מענדי קאטלארסקי - טשערמאן פון חב"ד'ס גלאבאלע נעטווארקס און די 'שלוחים פאונדעישאן' - געמאלדן אז זיי פארברייטערן זייערע מקוה גרענטס.

אינספירירט פונעם רוף פונעם ליובאוויטשער רבי'ן זצ"ל צו בויען מקוואות אין יעדן שטאט, האט די פאונדעישאן שוין באצאלט צו בויען 123 מקוואות אין די לעצטע פיר יאר אליינס.

די נויט פאר מקוואות איז גאר קריטיש. אין פלעצער ווי סאנטא טערעזא אין קאסטא ריקא; אוקלאנד, ניו זילאנד; און אין טאנזאניע, דארפן פאמיליעס נעמען א פליגער צו קענען אנקומען צו א מקוה.

אין בענד, ארעגאן; מאר דעל פלאטא, ארגענטינע; און סאן מיגעל דע אלענדע, מעקסיקא, דארפן אידן פארן צווישן דריי און זעקס שעות צו גרייכן די נאנטסטע מקוה.

"די שלוחים זענען די גלאבאלע סופארט סיסטעם פאר כלל ישראל," האט הרב קאטלארסקי געזאגט. "אמאל מיינט עס א תורה שיעור אדער א פשוט'ע שמועס. אבער אנדערע צייטן מיינט עס צו בויען די אידישע אינפראסטרוקטור, ווי צום ביישפיל די ערשטע מקוה אין א ראדיוס פון הונדערטער מיילן. מיר זענען דא זיי צו שטיצן, און מיר זענען טיף דאנקבאר פאר די גרופע פון וויזיאנערישע שותפים וועמענס ברייט-הארציגקייט האט געמאכט די פאנדן מעגליך."

דריי יאר נאך אקטאבער 7, איז דא א שטארקע התעוררות ביי אידן איבער די וועלט, און חב"ד איז א הויפט אדרעס פאר דעם. לויט א יערליכע סורוועי פון די 'דזשואיש פעדערעישאנס אוו נארט אמעריקע', זאגן 38% פון אמעריקאנער אידן אז זיי זענען יעצט מער פארבונדן צו אידישקייט, און 32% פון די וואס זענען אקטיוו אין די קאמיוניטי טוען דאס דורך חב"ד, וואס איז אסאך העכער ווי אנדערע אידישע ארגאניזאציעס און פאונדעישאנס וואס האבן געצויגן ארום א פערטל.

אין לאבאק, טעקסאס, וואוינען קרוב צו 300,000 מענטשן, און דער ארטיגער שליח הרב זלמן בראון און זיין רעביצין חנה ליבא שאצן אז עטליכע הונדערט פון זיי זענען אידן. פאר די אידן באדייט א גיין אין מקוה צו דרייוון ארום פינף שעות אין סיי וועלכע דירעקציע.

"פון די ערשטע מינוט וואס מיר האבן זיך אהערגעצויגן, האבן מיר געוואוסט אז מיר מוזן בויען א מקוה," זאגט הרב בראון.

אבער א קאמיוניטי פון עטליכע הונדערט אידן קען נישט אזוי גרינג דעקן די פולע קאסטן פון בויען א מקוה.

די משפחת בראון האט שוין אויסגעקליבן א פלאץ אין די בעקיארד פון א פראפערטי וואס זיי האבן געקויפט פאראיאר, און די נייע גרענט העלפט זיי יעצט פאראויסגיין מיט'ן פראדזשעקט. ווען עס וועט פארטיג ווערן, וועט נארטוועסט טעקסאס האבן איר ערשטע מקוה.

אין טראווערס סיטי, מישיגען, וואו הרב לייבל און חיה שם-טוב פירן אן מיט'ן לאקאלן חב"ד צענטער, האבן פאמיליעס ביז יעצט געדארפט פארן ארום צוויי און א האלב שעות קיין גרענד רעפידס צו נוצן די נאנטסטע מקוה. דורכאויס די זומער חדשים, קען איינער וואס מאכט דעם רייזע אהין-און-צוריק אן איבערנעכטיגן, אנקומען אהיים צוויי אזייגער פארטאגס.

זעענדיג די געוואלדיגע נויט, האבן די משפחת שם-טוב שוין אנגעהויבן בויען.

זיי בויען די מקוה אינעווייניג אינעם חב"ד צענטער און ערווארטן אז די ארבעט אויפ'ן בור זאל אריינגיין אין די לעצטע פאזעס אין די קומענדיגע וואכן.

"עס איז א 'געימטשעינדזשער' (א טאטאלע טויש)," האט הרב שם-טוב אויסגעפירט.