היסטארישע געפינס אין רוסלאנד: באהאלטענע סידורים און ספרים אנטדעקט ביי רענאוואציעס אין קאסטראמא

ארבעטער וועלכע זענען געווען פארנומען מיט רענאוואציע ארבעט אין אן היסטארישן אידישן קהילה-בנין אין קאסטראמא, רוסלאנד, האבן אנטדעקט אלטע סידורים און אנדערע ספרים וואס זענען לויט אלע ווארשיינליכקייטן געווארן באהאלטן דורכאויס די שווערע יארן פון די קאמוניסטישע רדיפות.

די געפינס איז אפירגעקומען אינמיטן די אנגייענדע איבערבוי ארבעט אינעם היסטארישן בנין וואס באלאנגט צו די ארטיגע אידישע קהילה. צווישן די חפצים האט מען געפונען א ספר וואס איז געווען באהאלטן אינעם דעקל פון א גוי'אישע בוך, כדאי צו פארדעקן דעם אינהאלט פון די קאמוניסטישע רשעים. אינטערעסאנט איז, אז דער ספר איז געפונען געווארן אפן צו פרקי אבות.

די געביידע גייט צוריק צום יאר 1880, און איז געקויפט געווארן אין 1892 פאר דעם דעמאלטדיגן שטאטס רב, הגה"צ ר' צבי הירש שניידערמאן זצ"ל. שפעטער אין יאר 1903 איז די צענטראלע שול פון קאסטראמא געבויט געווארן אין איר הויף.

די אנטדעקונג קומט אין א צייט וואס די אידישע קהילה אין קאסטראמא האט אנגעהויבן שרייבן א נייעם ספר תורה לקראת אן היסטארישן יובל. די ספר תורה ווערט געשריבן אפצוצייכענען 100 יאר זינט די באפרייאונג פונעם פריערדיגן לובאוויטשער רבי'ן זצ"ל פון די סאוועטישע טורמע און גלות.

די כתיבת האותיות האט זיך אנגעהויבן נעבן דעם אוהל דורכאויס די יערליכע שבת סליחות נסיעה וואס ווערט ארגאניזירט דורך די רוסישע תורה און חינוך פונדאציע. לויט די פלענער וועט די נייע ספר תורה אריינגעברענגט ווערן קיין קאסטראמא אום י"ב-י"ג תמוז תשפ"ז, פונקט צום הונדערטסטן יארטאג פון די באפרייאונג פונעם פריערדיגן רבי'ן.

די ניי-אנטדעקטע ספרים דינען אלס א לעבעדיגע דערמאנונג פון א שווערע תקופה ווען רוסישע אידן זענען געווען געצווינגען צו באהאלטן זייער אידישקייט, און קומען יעצט ארויס פון באהעלטעניש אין א צייט וואס דאס אידישע קהילה-לעבן בליט ווייטער אין די זעלבע שטאט.