בס"ד

היסטארישע ראלי אין פערו: איבער 60,000 מענטשן פארזאמלט ביי א מאסיווע דעמאנסטראציע קעגן אנטיסעמיטיזם

צענדליגער טויזנטער מענטשן האבן זיך מאנטאג, נאוועמבער 2, פארזאמלט אין די הויפטשטאט לימא, פערו, פאר א ריזיגע דעמאנסטראציע קעגן אנטיסעמיטיזם און ארויסצוצייגן סאלידאריטעט מיט ארץ ישראל.

לויט די באריכטן האבן זיך באטייליגט איבער 60,000 מענטשן ביים ראלי, וואס מאכט עס פאר איינע פון די גרעסטע פובליק דעמאנסטראציעס קעגן אנטיסעמיטיזם אין דעם דרום אמעריקאנער לאנד. די אונטערנעמונג איז ארגאניזירט געווארן דורך די 'מארטש אוו לייף' איניציאטיוו, און האט באקומען שטיצע פון פארשידענע קריסטליכע און רעליגיעזע ארגאניזאציעס, אריינגערעכנט די 'מאווימיענטא מיסיאנערא מונדיאל' גרופע.

דער ריזיגער ציבור וואס איז ארויסגעקומען צייגט א שטארקע קאאפעראציע פון רעליגיעזע פירער און דעם אלגעמיינעם פובליק זיך אנצונעמען קעגן די שרעקליכע ערשיינונג פון אנטיסעמיטיזם און צו שטיין אינאיינעם מיט די אידישע קהילות.

די מאסיווע פארזאמלונג האט געצויגן אינטערנאציאנאלע אויפמערקזאמקייט, און פארשידענע אידישע נייעס אגענטורן איבער די וועלט האבן ברייט באריכטעט דערוועגן.

דער מדינת ישראל אמבאסאדאר קיין פערו, גאלי דאגאן, האט זיך פערזענליך באטייליגט און אויפגעטראטן מיט א רעדע פאר די צענדליגער טויזנטער באטייליגטע. אין זיין דרשה האט ער ארומגערעדט איבער דעם שרעקליכן אויפשטייג אין אנטיסעמיטיזם זינט די אקטאבער 7 אטאקעס. ער האט אויך דערמאנט לשבח די היסטארישע אקטן פון פערוויאנער דיפלאמאטן וועלכע האבן געהאלפן ראטעווען אידן פון די נאצישע רדיפות אין אייראפע ביי די צווייטע וועלט מלחמה.

דאגאן האט אויך אויסגענוצט די געלעגנהייט צו באדאנקען די פערו רעגירונג פארן אדאפטירן די אפיציעלע ארבעטס-דעפיניציע פון אנטיסעמיטיזם וואס איז ארויסגעשטעלט געווארן דורך די 'אינטערנאציאנאלע האלאקאוסט געדענקעניש אליאנץ' (IHRA).

די היסטארישע ראלי האט צוזאמענגעברענגט פארשטייער פון די ארטיגע אידישע קהילה, רעליגיעזע פירער, און טויזנטער אנדערע בירגער אין א פאראייניגטע פראנט צו געדענקען דעם פארגאנגענהייט, קעמפן קעגן אנטיסעמיטיזם, און ארויסצייגן שטיצע.