טראגעדיע אין אינדיע: 37 יעריגער חרדישער טאטע פון 5 קינדער פון מודיעין עילית אומגעקומען אין אן עקסידענט
גאלערי
בס"ד
טראגיש: באקאנטער תלמיד חכם פון מודיעין עילית אומגעקומען אין א פאטאלן עקסידענט אין אינדיע
א שווערע טראגעדיע האט באטראפן דעם חרדי'שן ציבור אין ארץ ישראל, ווען עס איז אנגעקומען די ביטערע בשורה איבער די פריצייטיגע פטירה פון הרב מיכאל אליעזר דייטש ז"ל, א 37-יעריגער יונגערמאן און פאטער פון פינף קינדער פון מודיעין עילית, וועלכער איז טראגיש אומגעקומען אין אן עקסידענט בעת א באזוך אין רישיקעש, אין צפון אינדיע.
דער נפטר ז"ל, וועלכער איז ארגינעל פון ירושלים, איז געווען באקאנט אלס אן אמת'ער תלמיד חכם און א מתמיד עצום וואס האט אוועקגעגעבן זיין לעבן פאר לימוד התורה. ער האט איבערגעלאזט נאך זיך א רייכע ירושה, זייענדיג דער מחבר פון מער ווי 20 תורה'דיגע און הלכה'דיגע ספרים און קונטרסים, און איז געווען גאר שטארק געשעצט ביי אלע זיינע באקאנטע און ידידים.
די פונקטליכע דעטאלן און אומשטענדן ארום דעם פאטאלן עקסידענט זענען דערווייל נאכנישט פולשטענדיג קלארגעשטעלט געווארן.
זיין פלוצלינגדיגע און טראגישע פטירה האט איבערגעלאזט זיין משפחה און די גאנצע קהילה אין א טיפן שאק און טרויער. ער לאזט איבער א צובראכענע אלמנה און פינף יתומים'לעך וואס קלאגן אויפן גרויסן און אומערווארטעטן פארלוסט פון זייער טייערן מאן און טאטע.
עסקנים זענען יעצט אריינגעטון אין די שווערע ארבעט און לייגן אריין גרויסע באמיאונגען צו ערלעידיגן אלע נויטיגע פראצעדורן צו קענען ברענגען דעם ארון קיין ארץ ישראל לקבורה ווי אמשנעלסטן.
תהא נשמתו צרורה בצרור החיים.