נאך א פייער פארמיטן געווארן אין די לעצטע מינוט דורך 'חברים' וואלאנטירן

די חברים ארגאניזאציע האט אריינבאקומען א רוף איבער א שטארקע גערוך פון רויך וואס האט זיך געשפירט אין א בילדינג וואס האלט אינמיטן קאנסטראקשן, בשעת עס וואוינען דארט טענענטס אויף די אויבערשטע שטאקן.

ווען די מעמבערס זענען אנגעקומען אויפן סייט האבן זיי אנטדעקט אז נאכדעם וואס אן ארבייטער האט פארלאזט דעם פלאץ, האט די אינסולעישאן אינעווייניג אין די וואנט זיך אנגעכאפט פון די ארבעט וואס איז פריער געטון געווארן. דאס פייער האט שטילערהייט געשמאליעט אונטער די וואנט און האט שוין געהאלטן ביים פארברענען א 'טו-ביי-פאר' האלץ וואס איז געווען אריינגעשטעלט צווישן די ציגל.

בחסדי השם האבן די חברים מעמבערס עס געכאפט ממש אין די לעצטע סעקונדע. זיי האבן באוויזן צו פארלעשן דאס פייער און ארויסנעמען דאס ברענענדיגע האלץ בעפאר עס האט זיך געקענט חלילה פארשפרייטן איבער די גאנצע בילדינג.

א ספעציעלן דאנק פאר די איבערגעגעבענע חברים מעמבערס פאר זייער שנעלע און פראפעסיאנאלע רעאקציע וואס האט מעגליך אפגעראטעוועט פון א גרויסע קאטאסטראפע!