היסטארישע אנטדעקונג אין ירושלים: ארכעאלאגן געפינען 2,000-יאר אלטע וואסער סיסטעם וואס האט געפירט וואסער צום הר הבית

ירושלים — ארכעאלאגן האבן אנטדעקט א מערקווירדיגן טייל פון אן אור-אלטער וואסער סיסטעם וואס האט אמאל געפירט וואסער צום הר הבית, וואס גיט אן אינטערעסאנטן אריינבליק אין די אינפראסטרוקטור וואס האט געדינט די שטאט ירושלים מיט ארום 2,000 יאר צוריק.

די ניי-אנטדעקטע טייל פונעם אקוועדוקט (וואסער קאנאל) ציט זיך אויף א שטרעקע פון ארום 300 מעטער און איז געפונען געווארן דרום פון קיבוץ רמת רחל, דורכאויס ארכעאלאגישע גראבונגען וואס זענען דורכגעפירט געווארן בעפאר מ'הויבט אן בויען א נייע געגנט דארט.

די גראבונגען זענען דורכגעפירט געווארן דורך די ארטיגע 'רשות העתיקות', און איז פינאנצירט געווארן דורך די 'רשות מקרקעי ישראל'.

לויט די ארכעאלאגישע געפינסן, זענען די איבערבלייבענישן א טייל פונעם אזוי-גערופענעם "אונטערשטן אקוועדוקט", א היסטארישע וואסער קאנאל וואס איר ארגינעלע בוי-ארבעט ווערט צוגעשריבן צו די צייטן פון די חשמונאים.

דער קאנאל האט טראנספארטירט קוואל-וואסער פונעם גוש עציון ראיאן, דורכגייענדיג די געגנט פון די 'בריכות שלמה' דרום פון בית לחם, בעפאר עס האט ווייטער ממשיך געווען קיין ירושלים.

די סיסטעם, וואס ציט זיך אויף ארום 21 קילאמעטער, איז געבויט געווארן מיט א פונקטליכע אויסגערעכנטע שיפקייט, וואס האט ערמעגליכט פאר די וואסער צו פליסן איבער די בערגיגע פעלדער ניצנדיג בלויז די נאטורליכע גראוויטי.

די יעצטיגע אנטדעקונג שטעלט צו נאך א האנט-גרייפליכע פארבינדונג צו די רייכע היסטאריע פון ירושלים און די קאמפליצירטע סיסטעמען וואס זענען דעמאלטס אנטוויקלט געווארן צו צושטעלן וואסער פאר די שטאט און צום הר הבית.