טראץ די לעצטיגע עלעקשאן זיגן פאר די דעמאקראטישע פארטיי, קומט יעצט פאר אן אינערליכע קאמף, ווען די פראגרעסיווע דעמאקראטן פירן א מאסיווע קאמפיין צו טוישן די פירערשאפט און ארויסווארפן סענאט דעמאקראטישע פירער טשאק שומער און קאנגרעס מינאריטעט פירער האקים דזשעפריס פון זייערע פאזיציעס.

אן אנליין פעטיציע וואס איז געצילט קעגן דזשעפריס, אז ער זאל נישט באקומען דעם טיטל אלס 'הויז ספיקער', האט שוין לויט באריכטן אריבערגעשטיגן א מיליאן אונטערשריפטן. אין צוגאב האבן דעמאקראטישע געזעצגעבער אין קאנגרעס באקומען הונדערטער טעלעפאן קאלס פון אקטיוויסטן וואס פאדערן אז זיי זאלן אים נישט שטיצן.

די הויפט סיבה פאר די אויפברויז קעגן די צוויי הויכראנגיגע פירער איז צוליב זייער שטיצע פאר מדינת ישראל און זייערע נאענטע פארבינדונגען מיט פרא-מדינת ישראל פאליטישע גרופעס, אריינגערעכנט די באקאנטע 'עיפאק' (AIPAC) לאבי גרופע. די פראגרעסיווע אקטיוויסטן טענה'ן אז זייערע שטעלונגען שטימען שוין נישט מיט די היינטיגע פריאריטעטן און ריכטונג פונעם דעמאקראטישן באזע.

דערווייל אבער, טראץ דעם וואקסנדן דרוק, זענען ביידע פירער געבליבן אויף זייערע פאזיציעס, און עס איז נאך אומקלאר צי די קעגנער האבן בכלל גענוג שטיצע אין קאנגרעס צו קענען דורכפירן אזא דראסטישע טויש אין די פירערשאפט.