געריכט פארארדנט ביז 25 יאר אין א פסיכיאטרישע שפיטאל אין די מארד קעיס אינעם כולל אין בני ברק
גאלערי
געריכט אורטייל: מערדער פון האברך ר' ישי פורז ז"ל אין כולל חזון איש וועט אפגעשיקט ווערן אין א פסיכיאטרישן שפיטאל
א געריכט אין מדינת ישראל האט פארארדנט אז דער פארשוין וואס איז אנגעקלאגט געווארן אינעם מארד פונעם אינגערמאן האברך ר' ישי פורז ז"ל אינעם באקאנטן 'כולל חזון איש' אין בני ברק, זאל אריינגעלייגט ווערן אין א פסיכיאטרישן שפיטאל קעגן זיין ווילן. מיט דעם שריט ווערן די קרימינאלע פראצעדורן קעגן אים אפגעשטעלט.
דער באשלוס קומט נאכדעם וואס א פסיכיאטרישע אונטערזוכונג האט פעסטגעשטעלט אז דער פארדעכטיגטער האט געליטן פון א פסיכאטישן צושטאנד בעת דעם מארד, און געפינט זיך נאך אלץ אין דעם זעלבן מצב. באזירט אויף די דאקטוירים'ס רעזולטאטן, האט דאס געריכט באשלאסן אים אפצושיקן אין א פסיכיאטרישן אנשטאלט פאר א מאקסימום טערמין פון 25 יאר, אנשטאט אים צו שטעלן צו א קרימינאלן פראצעס און אים שיקן אין טורמע.
דער שוידערליכער מארד, וואס איז פארגעקומען דעם פארגאנגענעם חודש מאי, האט אויפגעטרייסלט די גאנצע חרדי'שע קהילה אין בני ברק. ר' ישי ז"ל איז אטאקירט געווארן אינעווייניג אין 'כולל חזון איש', א באקאנטע מקום תורה אין שטאט. לויט די באריכטן פון די אויספארשונג, איז דער מערדער אנטלאפן פונעם סצענע גלייך נאך די אטאקע, אבער איז שפעטער ארעסטירט געווארן דורך די פאליציי.
דורכאויס די אויספארשונגען איז ארויסגעקומען אז דער פארשוין האט שוין פריער געהאט צוגעטרעטן צו ר' ישי ז"ל און אים געסטראשעט מיט טראצדיגע רייד.
נאך זיין ארעסט האט דער פארדעכטיגטער דורכגעמאכט עטליכע פסיכיאטרישע עקזאמינאציעס, וויבאלד די אויטאריטעטן האבן געוואלט קלארשטעלן זיין גייסטישן צושטאנד און זען צי מען קען אנגיין מיט א געווענליכן קרימינאלן קעיס. די יעצטיגע געריכטליכע פארארדענונג צו סוספענדירן דעם קעיס און אים איינשפארן אין א שפיטאל פאר ביז 25 יאר, איז א וויכטיגע אנטוויקלונג אין א פרשה וואס האט איבערגעלאזט א טיפן רושם אויף די תורה קאמיוניטי אין בני ברק.