ברייטע חלוקה דורך 'משביע' אין פלעטבוש צוצושטעלן שפייז פאר נויטבאדערפטיגע פאמיליעס בעפאר יום כיפור

אין די יעצטיגע טעג פון עשרת ימי תשובה, האלט די באקאנטע 'משביע' ארגאניזאציע אן אירע ברייטע שפייז חלוקות אין פלעטבוש, צו פארזיכערן אז נויטבאדערפטיגע פאמיליעס זאלן האבן פרישע פראדוס און אנדערע וויכטיגע גראסערי ארטיקלען אויף יום טוב און בעפאר יום כיפור.

די חלוקה איז א טייל פון די יערליכע ימים נוראים קאמפיין וואס 'משביע' פירט אן, מיטן ציל צו העלפן טויזנטער אידישע פאמיליעס איבער ניו יארק. די ארגאניזאציע אפערירט עטליכע לאקאציעס, אריינגערעכנט אין פלעטבוש, בארא פארק און קווינס, וואו זיי טיילן סיי ווארימע צוגעגרייטע מאלצייטן און סיי פעקלעך מיט שפייז.

ביים פלעטבושער לאקאציע אויף קאני איילענד עוועניו, קענען פאמיליעס באקומען גרויסע פעקלעך מיט רויע גראסערי פראדוקטן וואס זיי קענען אליינס צוגרייטן אינדערהיים, בעת אין די זעלבע צייט ווערן סערווירט פרישע ווארימע נאכטמאלן אינעם גרויסן דיינינג רום פונעם צענטער. די פאנטרי אפטיילונג שטעלט יעצט צו מער ווי 2,000 אפוינטמענטס א וואך פאר מענטשן צו קומען אפנעמען הילף.

איבער די גאנצע 'משביע' נעצווערק, גיט די ארגאניזאציע איבער אז זיי טיילן אויס טעגליך מער ווי 300 ווארימע נאכטמאלן, און זיי פארטיילן נאנט צו 1,000 גראסערי פעקלעך יעדן איינציגן טאג, פינף טעג א וואך, צו פארלייכטערן דעם פינאנציעלן דרוק פון די פאמיליעס אין די ימי הרחמים והרצון.