בס"ד

 

דראמאטישע וואלן אין מדינת ישראל: עקזיט פאולס צייגן אומקלארע רעזולטאטן; נתניהו און אייזענקאט ביידע אן א קלארע מאיאריטעט

נאך א שטורמישע טאג פון וואלן אין מדינת ישראל, זענען די ערשטע 'עקזיט פאולס' ארויסגעקומען, און עס זעט אויס אז דאס לאנד גייט אריין אין א פרישע פאליטישע פלאנטער. לויט די ערשטע שאצונגען, האבן סיי דער יעצטיגער פרעמיער מיניסטער בנימין נתניהו און סיי זיין הויפט קעגנער גדי אייזענקאט נישט קיין קלארע מאיאריטעט פון 61 זיצן אין די 120-זיצן כנסת.

צעטיילטע עקזיט פאולס
די צענטראלע נייעס קאנאלן זענען שטארק צעטיילט אין זייערע שאצונגען. קאנאל 11, 12 און 13 געבן פארן נתניהו בלאק בלויז 50 זיצן, בשעת די אייזענקאט בלאק באקומט צווישן 52 און 53 זיצן. פון די אנדערע זייט, צייגט קאנאל 14 א גאר אנדערע בילד, געבנדיג פאר נתניהו 60 זיצן - בלויז איין זיץ ווייניגער פון א מאיאריטעט.

אט איז די פונקטליכע טאבעלע פון די עקזיט פאולס ווי עס איז געוואויגן געווארן דורך די קאנאלן:

די אראבישע פארטייען, וואס באקומען צווישן 17 און 18 זיצן, קענען זיך טרעפן אלס די 'קינג מעיקערס' אין די קומענדיגע קאאליציע פארהאנדלונגען. דערווייל האט גדי אייזענקאט, פירער פון די 'ישר' פארטיי, שוין דערקלערט אז ער גייט ארבעטן שנעל צו טוישן די יעצטיגע נתניהו רעגירונג, כאטש ער האט צוגעגעבן אז מען דארף ווארטן אויף די אפיציעלע רעזולטאטן.

א שטארקע קלאפ פארן רעכטן בלאק איז דאס וואס צוויי קלענערע רעכטע פארטייען - עפר ווינטער'ס 'עמך ישראל' און די פאראייניגטע ליסטע פון יועז הענדל און ירון זעלכה - האבן לויט די שאצונגען נישט אריבערגעשפרייזט דעם אחוז החסימה פון 3.25 פראצענט. דאס קען שטארק קאמפליצירן נתניהו'ס שאנסן צו צאמשטעלן א רעגירונג, וויבאלד די שטימען גייען לטמיון און ווערן נישט פארוואנדלט אין קיין כנסת זיצן.

היסטארישע צאל וויילער
די היינטיגע וואלן האבן געזען אן אומגעווענליכע הויכע צאל וויילער. ביז 8:00 ביינאכט האבן 74.3 פראצענט פון די בארעכטיגטע וויילער שוין אפגעגעבן זייער שטימע, וואס דאס איז די העכסטע ראטע אין די שעה זינט יאר 1988. דאס איז א שפרונג פון אכט פראצענט קעגן די וואלן אין 2022. שוין פריער אינעם טאג, ביי 6:00 נאכמיטאג, האט די ראטע געהאלטן ביי 66.7 פראצענט, און ביי 4:00 נאכמיטאג ביי 55.7 פראצענט.

אין די חרדי'שע שטאט בני ברק האט זיך אנגעזען א מאסיווע אקציע אין די לעצטע מינוטן בעפאר די וואל אורנעס האבן זיך פארמאכט. איבער 300 וואלאנטירן האבן געארבעט אויף די טעלעפאנען ארויסצושלעפן יעדן איינציגסטן וויילער צו די שטים בודקעס.

אויך אין די תפיסות איבערן לאנד איז געווען א רעקארד טוירנאוט, מיט 88.7 פראצענט ארעסטאנטן וואס האבן געשטימט, א שארפע העכערונג פון די 79 פראצענט אין 2022.

צוליב די לאנגע רייעס ביי די שטים בודקעס, האבן עטליכע פארטייען אריינגערעכנט ליכוד, ש"ס און עוצמה יהודית געבעטן צו פארלענגערן די וואלן ביז 11:00 ביינאכט. די צענטראלע וואל קאמיטע האט קלארגעשטעלט אז יעדער וואס שטייט שוין אין די רייע בעפאר 10:00 וועט קענען שטימען, אפילו אויב עס נעמט לענגער.

קלאגעס, אינצידענטן און ארעסטן דורכאויס דעם טאג
נפתלי בענעט'ס 'ביחד' פארטיי האט אריינגעגעבן א קלאגע צו די וואל קאמיטע, באשולדיגנדיג אז די ליכוד פארטיי נוצט א סמארטפאן עפפ אומלעגאל צו נאכפאלגן וויילער ביי די שטים בודקעס. די קאמיטע האט געזאגט אז זיי האבן דערווייל נישט קיין באווייזן דערויף, און האבן איבערגעחזר'ט דעם געזעץ אז מען טאר נישט ארויסגעבן קיין אינפארמאציע ווער עס האט שוין געשטימט.

די קאמיטע האט אויך אפגעווארפן קלאנגען איבער א סיסטעמאטישע פעלשונג פון צעטלעך, זאגנדיג אז יעדע קלאגע איבער פארשוואונדענע אדער צעריסענע צעטלעך ווערט באהאנדלט אינדיווידועל אויפן פלאץ.

אין די שטאט טייבע איז די אראבישע כנסת דעפוטאט אכמד טיבי אריינגעפאלן אין א היציגע געפעכט ביי א שטים בודקע, ווי מען זעט אים אויף ווידעא זיך קריגן מיט אן אנדערן פערזאן איבער די לאנגע רייעס.

אין אן אנדערע אינצידענט אין די שטאט רהט, האט אויסגעבראכן א געשלעג צווישן צוויי פאמיליעס ביי א שטים בודקע. פאליציי האט ארעסטירט פיר פארשוינען נאכדעם וואס בענקלעך זענען געפלויגן און מענטשן האבן זיך געשלאגן.

פריער אינעם טאג זענען דריי פארשוינען ארעסטירט געווארן אין די נגב ראיאן אויף פארדאכטן פון וואל-כאבאר, נאכדעם וואס פאליציי האט געטראפן קאווערטן מיט צענדליגע טויזנטער שקלים צוזאמען מיט צעטלעך פון די אראבישע 'רע"ם' פארטיי. די פארטיי האט געלייקנט די באשולדיגונגען.

'א בליק לייוו' וועט ווייטער פאסן אן אויג און ברענגען די פרישסטע אפדעיטס ווי נאר די אפיציעלע רעזולטאטן הייבן אן אריינצופליסן.