אוקיטשאבי, פלארידע — ווען דער יוטיובער טיילער אליוועירא האט זיך אראפגעלאזט אויפן בוי-פלאץ פונעם נייעם חרדישן ישוב אין פלארידע, האט ער געמיינט אז ער גייט דא מאכן א גרויסע סענסאציע. ער האט אבער געהאט א גראבן טעות, ווען ער האט זיך דארטן אנגעשטויסן אין אן אלטן בארא פארקער עסקן וואס איז נישט נעכטן געבוירן געווארן.

אליוועירא, וואס האט זיך שוין באקאנט געמאכט מיט זיינע אנטיסעמיטישע ווידעאס, איז די טעג אריינגעפאלן ביי "לעיקפראנט עסטעיטס" (Lakefront Estates), דער ריזיגער פראיעקט וואס האלט אינמיטן וואקסן נעבן אוקיטשאבי. דארטן אויפן פלאץ איז אים אנטקעגן געקומען ר' יודל פערלשטיין, דער לאנגיעריגער טשערמאן פון בארא פארקס קאמיוניטי בארד 12 און דער רוח החיים אונטער דעם נייעם ישוב.

ווי מען דערציילט פון דער סצענע, האט ר' יודל — וועלכער דרייט זיך שוין צענדליגער יארן אין די קארידארן פון סיטי האל פאר בארא פארק — אים באגריסט מיט א ברייטן שמייכל און א היימישן "שלום עליכם", איידער ער האט אים קלאר און שארף אפגעענטפערט אויף אלע זיינע פוסטע טענות. אנשטאט זיך צו קאכן אדער זיך לאזן אריינשלעפן אין א קריגעריי, האט ר' יודל געהאלטן קאפ, איבערגענומען די לייצעס פונעם שמועס, און אים אינגאנצן אויסגעלאזט די פארע.

א נייער מקום תורה וחסד
די גאנצע מעשה האט פאסירט אויפן שטח וואו עס ווערט אויפגעבויט א שפאגל-נייע, זעלבסטשטענדיגע אידישע קהילה אין פלארידע. די פלענער פאר "לעיקפראנט עסטעיטס" נעמען אריין אן ערך 1,300 הייזער מיט בתי מדרשים, מוסדות התורה, מקוואות, און אלע היימישע געשעפטן — אן אמת'ער רעטונגס-פלאן פאר אידישע משפחות וואס ווערן דערשטיקט פון די טייערע דירה-פרייזן אין ניו יארק.

געבליבן מיט גארנישט
דער יוטיובער האט קענטיג געהאפט ארויסצובאקומען הייסע קליפס און גערייצטע קולות פאר זיינע נאכפאלגער, אבער ר' יודלס ישוב הדעת און ערפארונג האבן געמאכט אז דער גאנצער עסק זאל זיך אויסלאזן מיט גארנישט — אן קיין שום דראמע און אן די סקאנדאלן וואס ער האט אזוי שטארק געזוכט.