ברוך דיין האמת: 6-יעריג אינגל טראגיש אומגעקומען אין א שוידערליכן עקסידענט אין מודיעין עילית

א שרעקליכע טראגעדיע האט פאסירט זונטאג נאכמיטאג אין די שטאט מודיעין עילית, ווען א 6-יעריג אינגל, הילד אלעזר משה נוקריאן ז"ל, איז ל"ע אומגעקומען נאכן ווערן אראפגעקלאפט דורך א באס אינדערצייט וואס ער איז געפארן אויף זיין סקוטער אויף די אבני נזר גאס.

הצלה וואלאנטירן און מגן דוד אדום פאראמעדיקס זענען ארויסגערופן געווארן צום סצענע ארום 5:10 נאכמיטאג און האבן באלד אנגעהויבן מיט קריטישע לעבנס-רעטונג אפעראציעס. טראץ זייערע העראישע באמיאונגען אים צו ראטעווען, זענען זיינע וואונדן געווען צו שווער און מען האט ליידער געמוזט באשטעטיגן זיין טויט אויפן ארט.

דאס קינד איז א זון פון יבלחט"א הרב אברהם ישעיהו נוקריאן. די לוויה פונעם יונגן קרבן איז פארגעקומען זונטאג אוונט, באגלייט מיט גרויס געוויין און צער דורך די צובראכענע משפחה און תושבי העיר.

די ארטיגע פאליציי האבן געעפנט אן אויספארשונג צו דערגיין די פונקטליכע אומשטענדן וואס האבן געפירט צו דעם טראגישן עקסידענט.