מאסן היימישע איינוואוינער באטייליגן זיך ביי א גרויסע 'געט-אוט-דהע-וואוט' ראלי אין מאנסי

א גרויסער ציבור תושבי מאנסי האט זיך פארזאמלט דעם זונטאג, אקטאבער 25, ביי 33 דאונטאון דרייוו אין מאנסי, צו א מאסיווע 'געט-אוט-דהע-וואוט' ראלי. ביי דעם מעמד האבן אויפגעטראטן דער לאקאלער קאנגרעסמאן מייק לאולער, ווי אויך דער נאסאו קאונטי עקזעקיוטיוו און בעפארשטייענדער גאווערנאר קאנדידאט ברוס בלעיקמאן. דערצו האבן די באקאנטע היימישע זינגערס ליפא שמעלצער און שמילי אונגאר אויפגעטראטן און אונטערגעהאלטן דעם ציבור.

דער צוזאמקום איז פארגעקומען ארום א ספעציעלע אויפגעשטעלטע בימה אינדרויסן, וואו פילע מיטגלידער פון די לאקאלע היימישע קאמיוניטי האבן זיך צוזאמגענומען מיט גרויס אינטערעסע, אין ליכט פון די בעפארשטייענדע קריטישע וואלן.

ווידעא קליפס וואס זענען פארשפרייט געווארן פונעם ראלי צייגן ווי די רעדנער טרעטן אויף פאר די מאסן באטייליגטע, בעת מען זעט כסדר פרישע עולמות שטראמען צום ארט. דער הויפט ציל פונעם גרויסן צוזאמקום, וואס האט צוזאמענגעברענגט פאליטישע פיגורן מיט די לאקאלע מאנסי איינוואוינער, איז געווען צו מוטיגן דעם ציבור ארויסצוגיין שטימען און זיכער מאכן אז די קאמיוניטי ווייזט ארויס א שטארקע כח ביים שטים בודקע.