אומאן — א שוידערליכע טראגעדיע האט פאסירט אין אומאן אין די טעג ארום ראש השנה, ווען א 44-יעריגער איד, א טאטע פון 7 קינדער פון לאנדאן, ענגלאנד, איז ל"ע געפונען געווארן אן רוח חיים אין א וואלד-געגנט נעבן דעם ציון פון הרה"ק ר' נחמן מברסלב זי"ע.

לויט די אוקראינישע אויטאריטעטן, איז דער נפטר א בריטישער בירגער וועלכער האט געוואוינט אין לאנדאן. לאקאלע עמערדזשענסי פערסאנאל זענען אראפגערופן געווארן צום סצענע נאכדעם וואס מען האט אים געפונען, אבער זיי האבן ליידער בלויז געקענט קאנסטאטירן זיין טויט אויפן ארט.

די אוקראינישע פאליציי האט תיקף געעפנט אן אויספארשונג איבער די אומשטענדן ארום זיין פטירה, און האבן פארארדנט א פאראענזישע אונטערזוכונג צו דערגיין די פונקטליכע סיבה פונעם טויט. כאטש וואס די ערשטע באריכטן האבן ארויסגעברענגט חששות אז ער איז מעגליך אומגעקומען אונטער פארדעכטיגטע אומשטענדן, האבן די אויטאריטעטן דערווייל נישט באשטעטיגט אז עס האנדלט זיך פון א מארד, און די אויספארשונג גייט נאך אן.

דער טראגישער אינצידענט האט פאסירט אין א צייט וואס צענדליגע טויזנטער אידן פון איבער דער גארער וועלט האבן זיך געפינען אין אומאן צוליב דעם יערליכן קיבוץ אויף ראש השנה.

וואלאנטירן פון 'איחוד הצלה' זענען געווען פון די ערשטע אנצוקומען אויפן סצענע נאכן טרעפן דעם קערפער. ווי באריכטעט, זענען עסקנים פון די אינטערנאציאנאלע אפטיילונג פון 'זק"א' אויך אריינגעמישט אין די באמיאונגען ארום דעם כבוד המת און צו מאכן די נויטיגע ארדענונגען פאר די קבורה.