פרייליכע סצענעס אויף א פליגער קיין ארץ ישראל בעת חסידי ברסלב קערן זיך צוריק פון אומאן

סצענעס פון גרויס שמחה האבן זיך אפגעשפילט אויף א פליגער וואס האט געטראגן אידישע פאסאזשירן צוריק קיין ארץ ישראל נאכן וויילן אויף ראש השנה אין אומאן. אין א ווידעאו וואס איז דינסטאג פארשפרייט געווארן, זעט מען ווי די פאסאזשירן זינגען און טאנצן מיט גרויס התלהבות אינעם פליגער, פייערנדיג דאס ענדיגן זייער לאנגע און שווערע רייזע אהיים.

די פרייליכע בילדער קומען אין א צייט וואס צענדליגער טויזנטער מתפללים מאכן זיך דעם וועג ארויס פון אוקראינע נאך ראש השנה. וויבאלד די אוקראינישע לופטן זענען נאך אלץ פארמאכט פאר ציווילע פליגערס, ברויכן די טויזנטער אידן וואס קערן זיך צוריק פון אומאן מאכן א לאנגע און אויסמאטערנדע רייזע מיט באסעס צו די לופטפעלדער אין די ארומיגע לענדער ווי מאלדאווע, רומעניע און נאך, פון וואו זיי כאפן א פליגער אהיים.

דער קעשענעווער לופטפעלד אין מאלדאווע האט אפילו איינגעפירט צייטווייליגע באגרעניצונגען ביז סעפטעמבער 17, ספעציפיש צוליב דעם ריזיגן פלייץ פון פאסאזשירן וואס פארפלייצן דאס ארט נאכן ענדיגן די נסיעה אין אומאן.

ווי אויך האט די יאס (Iași) לופטפעלד אין רומעניע באהאנדלט א ריזיגע צאל רייזנדע, מיט איבער 8,000 פאסאזשירן וואס זענען ערווארטעט דורכצוגיין דעם לופטפעלד, און 25 פליגערס קיין תל אביב וואס זענען סקעדזשולד געווארן צווישן סעפטעמבער 14 און 16.

די פרישע ווידעאו איז בלויז איינס פון די פילע פרייליכע סצענעס וואס באגלייטן די לאנגע נסיעה אהיים נאכן פראווען דעם יום טוב ראש השנה ביים ציון פון ר' נחמן מברסלב אין אומאן.