זעקס מענטשן האבן פארלוירן זייער לעבן און נאך ניין זענען פארוואונדעט געווארן, נאכדעם וואס א מאסיווע 'טרי-אלארם' פייער האט פארניכטעט א וואוין-געביידע אין סאנסעט פארק, ברוקלין, הארט נעבן בארא פארק, דאנערשטאג פארטאגס, נאוועמבער 5.

דאס פייער האט אויסגעבראכן קורץ פאר 1:40 פארטאגס אינעם בנין אויף 653 58'טע סטריט, און האט זיך גאר שנעל פארשפרייט איבער די גאנצע צוויי-שטאקיגע געביידע, ווען ריזיגע פלאמען האבן ארויסגעשלאגן פון עטליכע פענסטערס.

איבער 230 פייערלעשער און עמערדזשענסי פערסאנעל זענען אראפגערופן געווארן צו די סצענע צו קעמפן מיט די פלאמען. די פייערלעשער האבן באוויזן צו ראטעווען פיר מענטשן לעבעדיגערהייט פונעם ברענענדיגן בנין, אבער ליידער זענען פיר אנדערע קרבנות דערקלערט געווארן טויט אויפ'ן ארט, און נאך צוויי זענען אומגעקומען שפעטער נאכ'ן ווערן אפגעפירט אין שפיטאל.

צווישן די ניין פארוואונדעטע ציילן זיך פיר ציווילע בירגער, דריי פייערלעשער, און צוויי פאליציי אפיצירן.

די מאסיווע פייער האט אויך אנגעמאכט שאדנס פאר א דערנעבנדיגע געביידע און איבערגעלאזט עטליכע איינוואוינער אן א דאך איבער'ן קאפ, ביז עס איז ענדליך געברענגט געווארן אונטער קאנטראל ארום 4:28 פארטאגס.

פייער מארשאלס האבן געעפנט אן אויספארשונג איבער די אורזאך פונעם פייער. מ'האט געפונען 'ליטיום-איאן' בעטעריס אויפ'ן סצענע, אבער באאמטע האבן נאך נישט באשטעטיגט צי דאס איז טאקע געווען די אורזאך וואס האט געפירט צום טראגישן פייער.