א פרוי אין די זיבעציגער יארן איז טראגיש אומגעקומען זונטאג אינדערפרי נאכ'ן ווערן איבערגעפארן דורך א טראק אין די רחביה געגנט אין ירושלים.

דער שוידערליכער עקסידענט האט פאסירט ביים אינטערסעקשאן פון די רשב"א און רמב"ן גאסן. די מד"א דיספעטש צענטער אין ירושלים האט באקומען דעם עמערדזשענסי רוף ארום 10:06 אינדערפרי, איבער א פוסגייער וואס איז אראפגעקלאפט געווארן דורך א טראק.

די עמערדזשענסי פערסאנאל וואס זענען אנגעקומען אויפ'ן סצענע האבן געטראפן די פרוי באוואוסטלאז און מיט גאר שווערע וואונדן. מען האט באלד אנגעהויבן מיט העפטיגע רעטונגס אפעראציעס, אבער ליידער האבן די רעטונגס אגענטורן ענדליך געמוזט באשטעטיגן איר טויט אויפ'ן ארט.

די פאליציי האט גלייך אנגעהויבן א ברייטע זוכעניש נאכדעם וואס עס איז אריינגעקומען אינפארמאציע אז דער טראק וואס איז געווען פארמישט אינעם עקסידענט איז אנטלאפן פונעם ארט.

א קורצע צייט שפעטער האבן פאליציי אפיצירן אפגעפינען דעם טראק און ארעסטירט דעם פארדעכטיגטן דרייווער, א מאן אין די צוואנציגער יארן פון מזרח ירושלים. דער טראק איז קאנפיסקירט געווארן, און די ירושלים טראפיק אינוועסטיגעיטארס פירן ווייטער אן אויספארשונג איבער די אומשטענדן פונעם פאטאלן עקסידענט.