וויליאמסבורג. — דער קאנדידאט פאר ניו יארק גאווערנאר, ברוס בלעיקמאן, האט אפגעשטאט א באזוך אין וויליאמסבורג, וואו ער איז זיך צוזאמגעקומען אויף א וויכטיגע מיטינג מיט דעם באקאנטן פילאנטראפ ר' יואלי לאנדא און אנדערע לאקאלע קאמיוניטי פירער און עסקנים, צו דורכרעדן עטליכע וויכטיגע אישו'ס וואס אפעקטירן די היימישע משפחות אינעם געגנט.

די אסיפה איז פארגעקומען אין די שטוב פון ר' יואלי, וואו די באטייליגטע האבן ארומגערעדט איבער די פארשידענע טשאלענדזשעס וואס פלאגן די וואקסנדע קאמיוניטי אין וויליאמסבורג. א הויפט טעמע אויפ'ן טיש איז געווען די שרייענדע מאנגל אין 'עפארדעבל האוזינג', און די וויכטיגקייט צו טרעפן לעזונגען אז לאקאלע משפחות זאלן קענען בלייבן וואוינען אינעם געגנט און נישט דארפן אוועקמופן.

צווישן די אנדערע קריטישע אישו'ס וואס זענען אויפגעברענגט געווארן דורכאויס די געשפרעכן, האט מען שטארק ארומגערעדט איבער די חינוך הבנים והבנות און די רעכטן פון עלטערן צו קלייבן די פאסיגע מוסדות פאר זייערע קינדער (סקול טשויס), ווי אויך די אלגעמיינע זיכערהייט און סעיפטי אויף די גאסן.

דער באזוך האט געגעבן א גוטע געלעגנהייט פאר די עסקנים און פארטרעטער פונעם ציבור אראפצולייגן די געברויכן פון די היימישע קאמיוניטי דירעקט פאר א קאנדידאט וואס לויפט פאר א העכערע סטעיט-ווייד אפיס.

וויליאמסבורג איז די היים פאר א ריזיגע חסידישע קהילה, און די אישו'ס פון האוזינג, חינוך און פאבליק סעיפטי זענען פון די סאמע וויכטיגסטע פריאריטעטן פאר די איינוואוינער און די לאקאלע מוסדות. די צוזאמקום האט זיך קאנצענטרירט אויף די דאזיגע זארגן, בעת די לאקאלע פירער האבן קלארגעשטעלט די געברויכן פון די משפחות און מוסדות אין וויליאמסבורג.