איין טעראריסט אומגעקומען און צוויי פארוואונדעט נאך א קאר-רעמינג אטאקע אויף א צה"ל דזשיפ נעבן חברון

אנגעצויגענע מינוטן זענען אריבער היינט נעבן חברון אין יהודה ושומרון, נאכדעם וואס אן אראבישע קאר האט אריינגעקראכט אין א מיליטערישע דזשיפ, וואס האט געפירט דערצו אז די זעלנער זאלן גלייך עפענען פייער.

די מיליטער האט לכתחילה באריכטעט דעם אינצידענט אלס א פארזוכטע אטאקע אין די 'באני נעים' געגנט. לויט די באריכטן האבן די זעלנער נאכגעפאלגט א קאר מיט דריי פאסאזשירן וואס איז געפארן אויף א פארדעכטיגטע אופן, ווען פלוצלינג האט די קאר געגעבן א גאז און אריינגעקראכט דירעקט אינעם מיליטערישן דזשיפ. אלס רעאקציע האבן די זעלנער געעפנט א שווערע פייער אויפן קאר, און שפעטערדיגע באריכטן האבן באשטעטיגט אז די קוילן האבן געטראפן די אינעווייניג.

פונעם פולן בילד וואס איז שפעטער קלאר געווארן, שטעלט זיך ארויס אז איין פאלעסטינער איז אומגעקומען און די אנדערע צוויי זענען פארוואונדעט געווארן פונעם שיסעריי. ברוך השם איז קיינער פון די צה"ל זעלנער נישט געשעדיגט געווארן.

ווידעא קליפס פונעם סצענע צייגן דעם שמאלן שאסיי נעבן דעם אינצידענט, וואו מען זעט מיליטערישע טראקס און זעלנער ארום דעם ווייסן קאר. די 'באני נעים' געגנט, וואס געפינט זיך אין די חברון בערג, האט שוין ליידער געזען א רייע פון ענליכע קאר-אטאקעס אין די לעצטע יארן. די היינטיגע אטאקע האט געברענגט א שנעלע רעאקציע פונעם מיליטער, וועלכע האבן אויפגעשטעלט בלאקאדעס און טשעקפוינטס אין די ארומיגע געגנטער. דער אינצידענט ווערט ווייטער אויסגעפארשט דורך די זיכערהייט קרעפטן צו דערגיין פונקטליך וואס עס האט זיך אפגעשפילט אין די מינוטן בעפאר די שיסעריי.