טראגיש: 39-יעריגער פאטער פון צוויי קינדער אומגעקומען אין א שווערן עקסידענט אויף רוט 44 אין ארץ ישראל

מיט גרויס ווייטאג איז אויפגענומען געווארן די טראגישע נייעס איבער די פריצייטיגע פטירה פון ר' רונן זאבאראוו ז"ל, א 39-יעריגער פאטער פון צוויי קינדער פון די שטאט אזור, וועלכער איז אומגעקומען מיטוואך פארטאגס אין א שוידערליכן עקסידענט צווישן צוויי טראקס אויף רוט 44 נעבן בית דגן אין צענטראל ארץ ישראל.

די עמערדזשענסי רוף איז אריינגעקומען צו מגן דוד אדום (מד"א) ארום 2:54 פארטאגס. די פאראמעדיקס וועלכע זענען אנגעקומען אויפן סצענע האבן אים געפונען ליגן באוואוסטלאז און אן א פולס, און האבן תיקף אנגעהויבן מיט לעבנס-רעטונג פרואוון.

ער איז אפגעפירט געווארן אין א קריטישן צושטאנד צום 'שמיר' מעדיקעל צענטער, וואו די דאקטוירים האבן ליידער געמוזט פעסטשטעלן זיין טויט טראץ די אלע באמיאונגען צו ראטעווען זיין לעבן.

די צוויי טראק דרייווערס וועלכע זענען געווען פארמישט אינעם עקסידענט זענען בלויז לייכט פארוואונדעט געווארן. די ארטיגע פאליציי האט געעפנט אן אויספארשונג צו דערגיין די פונקטליכע אומשטענדן וואס האבן געפירט צו דעם פאטאלן צוזאמענשטויס.