בס"ד

טראגיש: א מאן אין די 50'ער יארן אומגעקומען אין א שרעקליכן עקסידענט אין דרום ארץ ישראל

א שרעקליכער און טראגישער עקסידענט האט פאסירט מאנטאג, נאוועמבער דעם 2'טן, ווען א צעמענט טראק האט זיך צוזאמענגעשטויסן מיט א קאר אויף רוט 222, נעבן די 'צאלים' מיליטערישע באזע אין דרום ארץ ישראל.

דער קראך איז געווען אזוי שטארק אז די קאר איז געווארן אינגאנצן צוקוועטשט, און דער דרייווער איז געבליבן שווער פארכאפט אינעווייניג. פייערלעשער זענען אראפגערופן געווארן צום סצענע און האבן געארבעט פיבערהאפטיג אים ארויסצושניידן פונעם צוקוועטשטן קאר, אבער ליידער האבן די מד"א פאראמעדיקס נישט געהאט קיין אנדערע ברירה ווי צו באשטעטיגן זיין טויט אויפ'ן ארט. דער אומגעקומענער איז א מאן אין זיינע 50'ער יארן.

א צווייטער פערזאן, א מאן אין די 40'ער יארן, האט געליטן פון מעסיגע וואונדן און איז אפגעפירט געווארן מיט א טשאפער צום 'סורוקה' שפיטאל פאר ווייטערדיגע מעדיצינישע באהאנדלונג.

וואלאנטירן פון זק"א זענען ארויסגעקומען צום ארט אפצוגעבן דעם כבוד המת און ארויסהעלפן מיט די שרעקליכע נאכווייען פון די טראגעדיע.

די פאליציי האט צייטווייליג אפגעשפארט דעם שאסיי און האט געעפנט אן אויספארשונג צו דערגיין די גענויע אורזאך פונעם עקסידענט.