איטאליע: פאליציי ארעסטירט 22-יעריגן נעא-נאצי וואס האט געפלאנט א מאסן-מארד אטאקע אויף א שול אין מילאן

איטאליענישע אויטאריטעטן האבן ארעסטירט א 22-יעריגן פארדעכטיגטן נעא-נאצי עקסטרעמיסט, וועלכער ווערט באשולדיגט אין גרייטן טעראריסטישע אטאקעס קעגן אידישע און מוסולמענישע צענטערן אין די מילאן געגנט. דער פארדעכטיגטער, אידענטיפיצירט אלס אלעסאנדרא גאבריעל גלאריאסא פון סאן דזשוליאנא מילאנעזע, האט לויט די באשולדיגונגען געפלאנט דורכצופירן אטאקעס מיט אויפרייס-מאטעריאלן און פייער-וואפן קעגן א שול אויף די 'וויא גוואסטאלא' גאס אין מילאן, ווי אויך קעגן אן איסלאמישע צענטער אין סאן דאנאטא מילאנעזע.

אויספארשער פון די ספעציעלע אפעראציעס גרופע (ROS) פון די קאראביניערי פאליציי האבן געפונען אויף זיינע עלעקטראנישע דעווייסעס עקסטרעמיסטישע פראפאגאנדע, האלאקאוסט-לייקענונג מאטעריאל, און שריפטן וואס דרוקן אויס א געוואלדטאטיגע ווייסע-סופרעמאסיסט אידעאלאגיע. די אויטאריטעטן האבן אויך אנטדעקט באווייזן פון זיינע צוגרייטונגען, אריינגערעכנט מאדיפיצירטע 'עירסאפט' וואפן און 'ANFO' עקספלאסיווס, וואס האט אויפגעברענגט ערנסטע זארגן איבער די מעגליכע פארנעם פון די געפלאנטע אטאקעס. לויט די אויספארשער, האט דער פארדעכטיגטער געפלאנט צו אפערירן אליין אלס א "לאון וואלף", און איז געווארן ראדיקאליזירט אנליין דורך עקסטרעמיסטישע מאטעריאל פארבינדן מיט די טרויעריג-בארימטע מאסן-מערדער אנדערס ברייוויק און ברענטאן טאראנט.

די אויספארשונג האט זיך אנגעהויבן רוקן פאראויס אין אויגוסט, נאכדעם וואס א חבר זיינער האט אלארמירט די פאליציי ווען ער האט באמערקט נאצי-פארבינדענע ארטיקלען ביי אים אין באזיץ, און האט אים געהערט רעדן איבער פלענער צו הרג'ענען אידן און מוסולמענער אין נאמען פון "באפרייען איטאליע". די אויספארשער האבן אויך אנטדעקט א 12-בלאט מאניפעסטא וואס אנטהאלט אנטיסעמיטישע, אנטי-מוסולמענישע און ווייסע-סופרעמאסיסט רעטאריק, אריינגערעכנט רעפערענצן צו אן אנגעבליכע איסלאמישע אינוואזיע און די חורבן פון די ווייסע ראסע. ספעציעל שרעקעדיג איז געווען זיין דעקלאראציע אינעם מאניפעסטא אז ער פלאנט צו נעמען פאראנטווארטליכקייט פאר א מאסן-מארד.

די אויטאריטעטן פארשן יעצט אויס צי די געפלאנטע אטאקעס זענען געווען געצילט אויפ'ן קומענדיגן יום טוב חנוכה, א צייט וואס די אידישע קהילות זענען סייווי אונטער א העכערע פאליצייאישע וואך. דער ארעסט האט ברוך השם אפגעשטעלט די בלוטיגע פלענער פון גיין ווייטער, כאטש די פולע פארנעם פון זיינע כוונות און די באווייזן קעגן אים זענען נאך אונטער געריכטליכע פראצעדורן. דער פאל האט פריש אויפגעוועקט די אויפמערקזאמקייט איבער די סכנה פון אנליין ראדיקאליזאציע און לאקאלע עקסטרעמיסטן וואס צילן רעליגיעזע קהילות.