המוני עם ביים כותל המערבי: צווייטע מעמד 'ברכת כהנים' ערווארטעט דעם דאנערשטאג חול המועד

די ימי חול המועד סוכות זענען אין פולן שוואונג ביים כותל המערבי, וואו מען גרייט זיך צום צווייטן גרויסן מעמד 'ברכת כהנים' וואס וועט פארקומען דאנערשטאג, כ' תשרי.

נאכדעם וואס די ערשטע ברכת כהנים איז פארגעקומען מאנטאג, וועט די צווייטע מעמד אפגעראכטן ווערן דאנערשטאג אינדערפרי, אין צייט וואס ריזיגע מאסן מתפללים האלטן אין איין שטראמען צום שריד בית מקדשנו דורכאויס די טעג פון חול המועד.

לויט ווי די 'קרן למורשת הכותל המערבי' גיט איבער, וועט דער סדר זיין ווי פאלגנד: תפילת שחרית וועט זיך אנהייבן 8:45 אינדערפרי, נאכגעפאלגט מיט ברכת כהנים פון שחרית ארום 9:30. מוסף וועט זיין 10:15, און די צווייטע ברכת כהנים פון מוסף וועט פארקומען 10:30.

צו סערווירן די צענדליגע טויזנטער באזוכער, זענען אויפגעשטעלט געווארן דריי גרויסע מהודר'דיגע סוכות ביים רחבת הכותל. ווי אויך האט מען צוגעשטעלט א ספעציעלע קליינע סוכה איבער די קאלטע וואסער פאנטעינס נעבן דעם אריינגאנג צום כותל, אקעגנקומענדיג די וואס זענען מקפיד נישט צו טרינקען קיין וואסער אינדרויסן פון א סוכה.

די קרן למורשת הכותל האט געמאלדן אז די אלע סוכות געשעענישן, אריינגערעכנט די דאנערשטאג'דיגע ברכת כהנים, וועט ווערן טראנסמיטירט 'לייוו' אויף זייער וועבזייטל.

דער סדר פון די יום טוב'דיגע טעג ביים כותל וועט זיך ענדיגן מוצאי שמחת תורה מיט די טראדיציאנאלע 'הקפות שניות', וואס וועט זיך אנהייבן 10:00 ביינאכט באגלייט מיט מוזיק און בערך 100 ספרי תורה.