בס"ד

ניו יארק סיטי פאליציי פארשן אויס א רייע מיסטעריעזע אינצידענטן וואו מענטשן זענען געזען געווארן אריינקריכן אין די שטאטישע סוער סיסטעם.

די ניו יארק סיטי פאליציי דעפארטמענט (NYPD) פארשט אויס נאך א מאדנע אינצידענט ארום די שטאטישע אונטערערדישע סוער סיסטעם, נאכדעם וואס דריי מענער זענען געזען געווארן אריינקריכן אין א מענהאול אין מאנהעטן זונטאג פארטאגס.

דער פרישער אינצידענט האט זיך אפגעשפילט קורץ פאר 1:00 ביינאכט אויף וועסט 141'סטע סטריט אין די העמילטאן הייטס געגנט, נעבן אמסטערדאם עוועניו. לויט די פאליציי, האט אן אנוועזנדער איבערגעגעבן אז ער האט געזען ווי די דריי פערזאנען גייען אריין אינעם אונטערערדישן סיסטעם. אבער ווען די פאליציי אפיצירן זענען אנגעקומען אויפן סצענע האבן זיי קיינעם נישט געקענט טרעפן. דאס איז די ערשטע מאל וואס אזא פאל ווערט באריכטעט אין העמילטאן הייטס, כאטש ענליכע מיסטעריעזע פעלער זענען שוין פארגעקומען אין עטליכע ניו יארק סיטי געגנטער אין די לעצטע פאר חדשים.

קוים צוויי טעג פריער, זענען פינף פערזאנען - אריינגערעכנט פיר מענער און איין פרוי - געזען געווארן ארויסקומען פון א מענהאול אויף איסט 82'סטע סטריט אינעם אפער איסט סייד. די גרופע איז אנטלאפן פונעם ארט אין א שווארצע עס-יו-ווי (SUV) נאך בעפאר די פאליציי איז אנגעקומען. אינוועסטיגעיטארס האבן שפעטער געפונען שויפלען און אנדערע געצייג דארט דערנעבן.

אין אן אנדערע אינצידענט פאריגן חודש, זענען צוויי פערזאנען ארעסטירט געווארן נאכן אריינגיין אין א מענהאול אויף איסט 61'סטע סטריט, פונקט אין די צייט וואס די יו-ען דזשענעראל אסעמבלי איז פארגעקומען און די זיכערהייט מאסנאמען איבער מאנהעטן זענען געווען גאר שטרענג.

באאמטע פון די שטאטישע דעפארטמענט אוו ענווייראמענטאל פראטעקשאן (DEP) גלייבן אז טייל פון די מענטשן קריכן אריין אין די אונטערערדישע סוער נעצווערק צו זוכן פאר טייערע זאכן און סקרעפ מעטאל, אריינגערעכנט חפצים וואס זענען אריינגעשוועמט געווארן אין די דרעינידזש סיסטעמען ביי שווערע רעגנס.

דערווייל האבן די אויטאריטעטן נאכנישט באשטעטיגט צי די אלע פרישע אינצידענטן זענען פארבינדן איינס צום צווייטן, אדער צי די פארמישטע האבן טאקע געזוכט פאר טייערע זאכן. די פאליציי האלט אינמיטן אויספארשן די פעלער, בשעת פראגעס בלייבן אפן איבער די נאכאנאנדע אומלעגאלע אריינדרינגונגען אין די שטאטישע אונטערערדישע אינפראסטרוקטור.