געהויבענער באזוך: דער ראשון לציון הגאון ר' דוד יוסף שליט"א אויף א באזוך אין שיכון סקווירא

מאנטאג נאכמיטאג איז פארגעקומען א געהויבענער באזוך אין שיכון סקווירא, ווען דער ראשון לציון, הגאון ר' דוד יוסף שליט"א, איז אנגעקומען אין שטעטל, וואו ער איז ווארעם אויפגענומען געווארן דורך די ארטיגע תושבים בעפאר ער איז אריין אל הקודש פנימה צום סקווירא רבי'ן שליט"א.

ווי מען קען זען אויף ווידעא קליפס פונעם באזוך, האבן זיך פארזאמלט צענדליגע חסידים און איינוואוינער פונעם שטעטל אפצוגעבן כבוד התורה און מקבל פנים זיין דעם חשוב'ן גאסט ביים אנקומען אין די חסידישע ווילידזש.

דער הויכפונקט פונעם באזוך איז געווען ווען דער ראשון לציון איז אנגעקומען בבית נאווה קודש פונעם סקווירא רבי'ן שליט"א. לויט ווי עס גיט איבער די 'איזראעל העריטעדזש פאונדעישאן', איז די געהויבענע באגעגעניש צווישן די צוויי גדולים אראנזשירט געווארן דורך זייער עקזעקיוטיוו דירעקטאר, הרב דוד כ"ץ, וועלכער האט אויך אפגעווארט און אויפגענומען דעם ראשון לציון ביים אנקומען.

לויט לאקאלע באריכטן, האט דער ראשון לציון אויך אפגעשטאט א באזוך ביים סקווירא דיין שליט"א דורכאויס זיין צייט אין שיכון סקווירא.

דער באזוך קומט פאר אין די ראמען פון א גרעסערע נסיעה וואס הגאון ר' דוד יוסף שליט"א קומט יעצט אפ אין אמעריקע, וואס האט געגעבן א געלעגנהייט פאר די תושבי שיכון סקווירא מקבל פנים צו זיין דעם גרויסן גאסט אין זייער קהילה.