איבער 65 טויזנט אידן האבן געפראוועט דעם היי-יעריגן ראש השנה אין אומאן, פיל מער ווי ערווארטעט

מער ווי 65,000 אידן האבן זיך באטייליגט ביים היי-יעריגן גרויסן קיבוץ אין אומאן אויף ראש השנה, לויט די אפיציעלע שאצונגען וואס זענען ארויסגעגעבן געווארן גלייך נאכן יום טוב.

די פרישע ציפערן צייגן א פיל גרעסערע באטייליגונג ווי מען האט ארגינעל געשאצט. ווי באריכטעט דא אויף 'א בליק' בעפאר יום טוב, האט מען ערווארטעט אז ארום 50,000 מענטשן וועלן קומען פראווען דעם יום טוב אין די אוקראינישע שטאט, אבער די נייע שאצונגען נאך יום טוב ווייזן אז דער ענדגילטיגער ציפער האט דראסטיש איבערגעשטיגן די ערווארטונגען.

טראץ די אנגייענדע מלחמה אין אוקראינע, די פארמאכטע לופטן פאר ציווילע פליגערס, און די לאנגע שווערע רייזעס דורך די ארומיגע לענדער, האבן צענדליגער טויזנטער אידן פון איבער דער גאנצער וועלט זיך ארויסגעלאזט אויפן וועג קיין אומאן צו זיין אויף ראש השנה.

די ארגאניזאציע 'איחוד ברסלב באומאן' האט איבערגעגעבן אז למעשה האבן זיך איבער 65,000 מתפללים באטייליגט ביים היי-יעריגן קיבוץ. דאס קומט נאך גרויסע הכנות און צוגרייטונגען אין קאאפעראציע מיט די לאקאלע אינסטאנצן און באאמטע צו קענען אקאמאדירן דעם ריזיגן פלייץ פון געסט.

בילדער און ווידעאוס פונעם קיבוץ צייגן דעם ריזיגן פארנעם פונעם מעמד, וואו ריזיגע מאסן מענטשן האבן אנגעפילט די גאסן און פובליק שטחים דורכאויס די טעג פון ראש השנה.