שוידערליכע קרימינאלע אטאקע אין צפון ארץ ישראל: פרוי אומגעקומען נאכדעם וואס א האנט-גראנאט איז אריינגעווארפן געווארן אין א געשעפט

זיכערהייט קאמערעס האבן אויפגעכאפט דעם שרעקליכן מאמענט שבת, נאוועמבער 14, 2026, ווען א האנט-גראנאט איז אריינגעווארפן געווארן אין א בעקעריי געשעפט אין כפר מנדא, אן אראבישע שטאט אין צפון ארץ ישראל.

דער אויפרייס האט באטראפן די געביידע און האט ליידער געקאסט דאס לעבן פון די 51-יעריגע לינא קאסעם זידאן, אן איינוואוינער פון די דרוזישע שטאט דאליאט על-קארמעל, וועלכע איז פונקט געווען אינעווייניג איינצוקויפן זיסווארג. נאך דריי מענטשן זענען פארוואונדעט געווארן אינעם אינצידענט, אריינגערעכנט איר מאן, וועלכער איז לויט באריכטן אראפגעקלאפט געווארן דורך די קאר פון די אטאקירער בשעת זיי זענען אנטלאפן פונעם סצענע.

די פרוי איז אריינגעפירט געווארן צום רמב"ם שפיטאל אין חיפה אין א קריטישן צושטאנד, וואו זי איז שפעטער געשטארבן פון אירע וואונדן.

די פאליציי האט ארעסטירט דריי פארדעכטיגטע קורץ נאכדעם און האבן געפונען דעם קאר וואס זיי האבן גענוצט. די אטאקע ווערט באהאנדלט אלס קרימינאלע געוואלדטאטן, און די מאטיוו ווערט נאך אויסגעפארשט. איינוואוינער פון כפר מנדא זאגן אז די שטאט זעט שוין א גאנצע חודש פון שיסערייען און גראנאט אטאקעס אויף הייזער און ביזנעסער. לאקאלע קוועלער געבן אן אז עס האט א דירעקטע פארבינדונג צו לעצטיגע קרימינאלע קעיסעס אין די שטאט.

מדינת ישראל פרעזידענט יצחק הערצאג האט אויסגעדרוקט זיין טיפע שאק איבער די מארד. לויט די ארטיגע מידיא, איז זידאן די ארום 200'סטע קרבן פון מארדן אין די אראבישע קאמיוניטי אין ארץ ישראל דעם יאר, א ציפער וואס הערצאג האט אנגערופן "שוידערליך". דער פאל האט אויפגעברענגט שווערע פראגעס צי די אויטאריטעטן זענען בכלל אומשטאנד אפצושטעלן די ארגאניזירטע פארברעכן און געוואלדטאטן וואס דערגרייכט שוין ביז צו פארנומענע איינקויף גאסן.