מדינת ישראל וואלן 2026: נתניהו פאלט קורץ פון א מאיאריטעט; קאאליציע פארהאנדלונגען ערווארטעט צו זיין שווער און קאמפליצירט

די וואלן אין מדינת ישראל וואס זענען פארגעקומען דעם 28'סטן אקטאבער 2026, האבן איבערגעלאזט דעם יעצטיגן פרעמיער מיניסטער בנימין נתניהו מיט א שווערן וועג פאראויס צו קענען צוזאמשטעלן די קומענדיגע רעגירונג. לויט די ערשטע רעזולטאטן, האלט נתניהו'ס רעכטע בלאק ביי בלויז 53 זיצן אינעם 120-זיצן כנסת.

פון די אנדערע זייט, האלט די אפאזיציע בלאק אנגעפירט דורך גדי אייזענקאט ביי 48 זיצן, בשעת די אראבישע פארטייען האבן געזען א מאסיווע שפרונג און האבן אינאיינעם באקומען 19 זיצן, וואס איז א היסטארישע רעקארד. קיינער פון די צוויי הויפט בלאקן האבן נישט דעגרייכט די נויטיגע 61 זיצן וואס פעלט זיך אויס צו האבן א מאיאריטעט אינעם כנסת, וואס מיינט אז דאס לאנד שטייט יעצט פאר מעגליכע לאנגע און קאמפליצירטע קאאליציע פארהאנדלונגען.

אין א זעקס-מינוטיגע נייעס אנאליז, טוט אלי שטיינבערג צונעמען וואס די רעזולטאטן באדייטן פאר די פאליטישע צוקונפט פון מדינת ישראל, און לייגט אראפ די אפציעס וואס די פארטיי פירער האבן יעצט אויפן טיש צו קענען צוזאמשטעלן א קאאליציע. כאטש נתניהו'ס בלאק איז נאך אלץ פאראויס אין די טיילווייזע רעזולטאטן, ווייזן די נומערן קלאר אז זיין יעצטיגע פאליטישע אליאנץ האט פארלוירן איר כנסת מאיאריטעט, וואס מאכט אים זייער שווער אנצוהאלטן די מאכט.

דער קומענדיגער פאזע וועט זיין ווען פרעזידענט יצחק הערצאג וועט זיך אראפזעצן מיט די פאליטישע פארטייען צו הערן זייערע רעקאמענדאציעס, בעפאר ער וועט באשליסן פאר וועלכן כנסת דעפוטאט צו געבן דעם מאנדאט צו פארמירן א רעגירונג.

אבער, צוזאמשטעלן א קאאליציע קען זיך ארויסשטעלן צו זיין גאר שווער. עטלעכע הויפט פיגורן אין די אפאזיציע האבן שוין אפגעווארפן סיי וועלכע קאאפעראציע מיט די אראבישע פארטייען, טראץ דעם וואס זייערע 19 זיצן קענען זיין דער דעצידירנדער פאקטאר צי אן אלטערנאטיווע רעגירונג קען האבן א מאיאריטעט.

מעגליכע סצענאריעס נעמען אריין אן אחדות רעגירונג צווישן די ליכוד פארטיי און אייזענקאט'ס 'ישר' פארטיי, צוזאמען מיט אנדערע מעגליכע פאליטישע קאמבינאציעס. אבער יעדע פון די אפציעס וועט פאדערן שווערע פארהאנדלונגען און קאמפראמיסן צווישן פארטייען מיט קעגנזייטיגע אינטערעסן. פריערדיגע פרואוון צו מאכן ברייטע קאאליציעס, אריינגערעכנט אפמאכן מיט אביגדור ליבערמאן אדער בעני גאנץ, צייגן ווי שווער עס איז צוזאמצוברענגען קעגנערישע פאליטישע לאגערן.

ביז ווילאנג א נייע רעגירונג ווערט געשאפן, ווערט ערווארטעט אז נתניהו וועט פארבלייבן אלס צייטווייליגע (קעירטעיקער) פרעמיער מיניסטער, אינדערצייט וואס די פארהאנדלונגען וועלן באשליסן צי ער קען שאפן גענוג שטיצע אינעם כנסת, אדער צי אן אנדערער קאנדידאט וועט באקומען די געלעגנהייט צו פארמירן די קומענדיגע רעגירונג.