שוידערליך: אנטיסעמיט פראטעסטירט מיט שילד וואס לויבט היטלער ימ"ש נעבן אידישע מוסדות אין לאס וועגאס

לאס וועגאס — אן אומבאקאנטער מאן איז געזען געווארן שטיין מיט א גאר העסליכע אנטיסעמיטישע שילד נעבן אידישע מוסדות אין די 'סאמערלין' געגנט אין לאס וועגאס, נעוואדע, אריינווארפנדיג די ארטיגע אידישע קאמיוניטי אין א שרעק.

דער שוידערליכער אינצידענט האט זיך אפגעשפילט דעם פארגאנגענעם אקטאבער 16. אויף ווידעא קליפס וואס צירקולירן אויף די נעצן, קען מען קלאר זען ווי דער פארשוין האלט א שילד מיט א מעסעדזש וואס לויבט דעם צורר היהודים היטלער ימ"ש, וואס האט ארויסגערופן א שטורעם פון פארדאמונגען.

די בילדער האבן ארויסגערופן גרויס זארג און אויפברויז צווישן די לאקאלע אידישע איינוואוינער און קאמיוניטי פירער. דער אינצידענט האט פריש אויפגעוועקט די פחדים איבער די זיכערהייט פון די אידישע פאמיליעס און מוסדות אין די געגנט, אין ליכט פון די שרעקליכע העכערונג אין אנטיסעמיטיזם און בייזוויליגע אנגריפן.