אומאן. – לעבעדיגע און געהויבענע סצענעס זענען אפגעכאפט געווארן נעבן דעם ציון פון הרה"ק רבי נחמן מברסלב זי"ע, ווי די אטמאספערע ווערט אלס מער דערהויבן וואס נענטער עס רוקט זיך צו צום הייליגן יו"ט ראש השנה.

א נייע ווידעא וואס איז פארשפרייט געווארן צייגט א געפאקטן ציון מיט פילע מתפללים, ווי די פארזאמלטע זינגען און טאנצן מיט גרויס התלהבות אינמיטן די ריזיגע מאסן וואס האלטן אין איין שטראמען קיין אומאן.

טויזנטער אידן זענען שוין אנגעקומען אין די אוקראינישע שטאט זיך צו באטייליגן אינעם יערליכן "קיבוץ" אויף ראש השנה, און נאך פילע טויזנטער ווערן ערווארטעט צו אנקומען אין די קומענדיגע טעג. ווי 'א בליק' האט שוין פריער באריכטעט, ווערן די גאסן ארום דעם ציון אלס מער געפאקט, און די הכנות צום גרויסן יו"ט גייען אן אין פולן שוואונג.

די פייערדיגע סצענע איז ארויסגעלייגט געווארן דורך א ברסלב'ער חסיד, אדאם קעניגסבערג, וועלכער האט עס באשריבן אלס "התלהבות'דיגע אידישע עבודת השם."