אין שיכון סקווירא האט זיך אין דער לעצטער תקופה פארמירט א שטילע מהפכה ווי נגידים האבן זיך צוזאמגענומען און אפגעמאכט צו דאפלען, פשוטו כמשמעו, דעם געהאלט פון די קרוב צו טויזנט בני תורה אין שטעטל.

דאס ווערט דורכגעפירט דורך א גאר חידוש'פולער בליציגער רעוואלוציאנערישער "מאדעל", וועלכער איז ערווארטעט צו קאפירט ווערן אין נאך קהילות קדושות בישראל. דער מאדעל לויטעט ווי פאלגנד: בערך א דריטל שטעטל זענען בני תורה און א דריטל שטעטל זענען בעלי יכולת (די איבריגע דריטל איז מלמדים, מגי"ש ועניים…), יעדער בעל יכולת קלויבט זיך אויס זיין פערזענליכן בן תורה פון צווישן די יושבי אוהל, און חתמ'עט מיט אים א שותפות יששכר זבולון צו דאפלען זיין געהאלט.

ווען דער סקווערער רבי שליט"א איז אהיימגעקומען פון מאליבו, קאליפארניע, וואו דער רבי האט דאן געוויילט אויף אפרוה, האט דער רבי אויפגענומען די בשורה מיט אן אומבאשרייבליכע שמחה און זיך ארויסגעשטעלט מיט א זעלטענער אויסנאם "הכרזת קודש" פרייטאג צונאכטס פארן גאנצן שטעטל צו מוטיגן דעם הייליגן היסטארישן רעוואלוציע. בתוך דבריו האט דער רבי האט ארויסגעברענגט אז דער רבי זצ"ל פלעגט גאר שטארק מעודד זיין בעלי יכולת צו נעמען א שותפות יששכר זבולון, ווי ס'שטייט אין שולחן ערוך אז ס'ווערט גערעכנט ווי מ'וואלט אליינס געלערנט.

ביי די רייכע "עמודי העולם" באנקעטן וואס זענען פארגעקומען פארגאנגענע וואכן, האט מען געקענט זען ווי גרויסע נגידים שלאגן זיך ארום און מאכן ביזנעס דיעלס: "איך דארף דעם יששכר", "איך נעם יענעם יששכר"…

דעם פארלאפענעם שבת זענען די מתפללים פונעם ביהמ"ד הגדול דשיכון סקווירא איבערראשט געווארן אריינקומענדיג אין שול, טרעפנדיג א ריזיגער אייגנארטיגער "פּלעֶק" על כותלי בית המדרש וואס באצייכנט די נעמען פון די קרוב צו טויזנט בעלי יכולת וואס האבן שוין געקליבן א שותפות, יעדער נגיד אין וועלכע כולל "ער לערנט" - על פי לשון השולחן ערוך אז ס'איז כאילו ער אליין זיצט און לערנט.

פיקאנטיש: דער באקאנטער סקווערער פילאנטראפ ר' נחום רוקח פון לעיקוואד וועלכער האט געקויפט אזויפיל ווי ניינצן (!) יששכר'ס, האט זיך געטראפן לערנען אין יעדן איינציגן סניף פונעם כולל… פון גמרא בעיון און בבקיאות, ביז הלכות שבת, הוראה, חושן משפט און אזוי ווייטער…

פארלאפענעם מאנטאג איז אפגעהאלטן געווארן דער פיפטער "עמודי העולם" באנקעט אין דער רייע, דאסמאל פאר די יונגערע בעלי בתים פון דער קהילה, דארטן האט געדינט אלס יושב ראש דער אלעמען-באקאנטער משמח אלקים ואנשים ר' יעקב יוסף לאנגסאם הי"ו, אליינס א זבולון פון שטעטל, וועלכער האט אונטערגעהאלטן די פארזאמלטע מיט א קריעטיוו-הומאריסטישער פראגראם, אין וועלכן ער האט אויסגעשפילט לעבעדיג דעם גאנצן הילוך החיים פון א בן תורה ווס. א בעל הבית…

ברוב כשרון האט לאנגסאם באוויזן ארויסצושלעפן אין פובליק פון עטליכע בעלי בתים די ציפערן פון זייער חודש'ליכן בודזשעט, ווי אפט זיי פארן אויף וואקאציע, און וויפיל שעה זיי לערנען… דערנאך אויפגעשטעלט עטליכע בני תורה און ארויסבאקומען פון זיי וויאזוי זיי פראווענען א העכערן לעבן, אפגעשיידט פון הבלי עולם הזה, ווען בלויז די תורה הקדושה אינטערעסירט זיי. אזוי אויך איז געהערט געווארן גאר אן אינהאלטסרייכע דרשה פון הגה"צ אב"ד לימינוב שליט"א.

צום הויכפונקט האט זיך די מסיבה געשלאסן מיט אן אומבאשרייבליכן סוקסעס, ווען אזויפיל ווי איין און פופציג שותפות'ן זענען געשלאסן געווארן דארט אויפן ארט; יעדער בעל הבית האט זוכה געווען צו חתמ'ענען שותפות מיט זיין האנט-געקליבענעם יששכר, פאר וועמען ער וועט צאלן דעם דאפלטן געהאלט און באקומען די גאנצע לימוד התורה אויף זיין קאנטע.

ווי געשריבן, זענען שוין פארהאן עטליכע גרויסע קהילות הקודש - סיי אין ארה"ב און אפילו אויך אין ארץ הקודש - וואס האלטן א נאנטן אויג אויף דעם תורה'דיגן מהפכה אין סקווירא, און עס איז ערווארטעט אז אויף שמחת תורה הבעל"ט וועלן ארויסקומען די מעלדונגען מיט אלע פרטים וויאזוי די היסטארישע רעוואלוציע וועט אי"ה דורכגעפירט ווערן ביי זיי אין דער קהילה. להגדיל כבוד התורה ולהאדירה.