א שרעקליכע שטעכעריי האט פאסירט היינט נאכמיטאג אין בית שמש, וואס האט איבערגעלאזט די שטאט אין א טיפן שאק און טרויער.

א טאטע וואס איז אהיימגעקומען צו זיין דירה אויף רחוב עמק הזיתים, האט געפונען זיינע צוויי קינדער (געשוויסטער, אין די עלטער פון 6 און 9 יאר) שווער פארוואונדעט פון שטעכערייען.

כוחות ההצלה האבן אריינגעפירט די קינדער אין שפיטאל.

איין קינד איז ליידער באשטעטיגט געווארן טויט, בשעת דאס צווייטע קינד געפינט זיך אין אן ערנסטן צושטאנד.

די פאליציי האט ארעסטירט א שכן אלס דער הויפט פארדעכטיגטער.

די אויטאריטעטן באטאנען אז דאס איז נישט קיין טעראר אטאקע, נאר מען פארשט אויס צי דער שכן ליידט פון א שווערע גייסטישע קריזיס.

די ביטערע בשורה קומט אין דעם זעלבן טאג וואס בית שמש האט שוין געליטן א צווייטע טראגעדיע, ווען אן אנדער קינד איז אומגעקומען אין א שרעקליכן קאר עקסידענט.

די אויספארשונג גייט ווייטער אן.