דראמא אין די לופטן: פליי-דובאי פליגער קיין ארץ ישראל מאכט עמערדזשענסי לאנדונג אין סאודי אראביע נאך א בלוטיגע געשלעג צווישן די פילאטן

א רוטינע 'פליי-דובאי' פליגער וואס האט זיך געהויבן פון דובאי אויפ'ן וועג קיין תל אביב, האט זיך פארוואנדלט אין א פולשטענדיגע עמערדזשענסי העכער די צפון-מעריב ראיאן פון סאודי אראביע, נאך א ברוטאלע קאנפראנטאציע אינעם קאקפיט.

לויט באריכטן פון 'סי-ען-ען' און אנדערע נייעס אגענטורן, האט די עירליין באשטעטיגט אז אן אינצידענט איז פארגעקומען אינמיטן די פלי. א מדינת ישראל באאמטער האט איבערגעגעבן פאר 'רויטערס' אז א ווילדע געשלעג האט אויסגעבראכן צווישן דעם הויפט פילאט און דעם קא-פילאט. פאסאזשירן האבן באריכטעט אז זיי האבן געזען בלוט אינעם קאבינע.

פליגער-טרעקינג דאטא צייגט א שרעקליכע בילד: דער פליגער איז דראסטיש געפאלן פון 34,000 פיס צו ארום 16,600 פיס אין בלויז צוויי מינוט, בעת די געשלעג האט זיך אפגעשפילט. אין די זעלבע צייט האט דער פליגער'ס טראנספאנדער ארויסגעשיקט דעם קאד 7700, וואס באדייט אן אלגעמיינע עמערדזשענסי, אבער עטליכע מינוט שפעטער האט עס זיך געטוישט צום קאד 7500 - דער אינטערנאציאנאלער סיגנאל פאר א היידזשעקינג אדער אומלעגאלע אריינמישונג. עווענטועל, ווען די סיטואציע האט זיך אביסל סטאביליזירט, איז דער קאד צוריקגעטוישט געווארן צו 7700.

דער פליגער האט ענדליך געמאכט א זיכערע לאנדונג אינעם טאבוק עירפארט אין סאודי אראביע ארום 10 אזייגער אינדערפרי. פליי-דובאי האט באשטעטיגט אז אלע פאסאזשירן זענען אומגעשעדיגט און געפינען זיך אין א זיכערע צושטאנד. די עירליין זאגט אז זייערע טיעמס ארבעטן אינאיינעם מיט די לאקאלע אויטאריטעטן און וועלן ארויסגעבן מער דעטאלן ווי נאר עס ווערט קלאר.

באלד נאכ'ן לאנדן האבן סאודישע זיכערהייט קרעפטן ארומגערינגלט דעם פליגער אלס א זיכערהייט מאסנאם, בעת אן אויספארשונג איז געווארן אונטערגענומען. אומבאשטעטיגטע קלאנגען געבן אן אז די צוויי פילאטן זענען פון צוויי אנדערע נאציאנאליטעטן, און אז אנגעצויגנקייט צווישן זיי האט מעגליך געפירט צו דעם געשלעג. פליי-דובאי האט דערווייל נישט קאמענטירט איבער די אידענטיטעט פון די פילאטן אדער וואס פונקטליך האט געפירט צו די קאנפראנטאציע.

וויבאלד דער אינצידענט האט פאסירט בלויז עטליכע שעה צוריק, זאגן באאמטע אז מען ווארט נאך אויף א פולע און קלארע באריכט. דערווייל גייט ארום א ווידעא וואס איז רעקארדירט געווארן דורך א פאסאזשיר אינעם פליגער, וואו מען זעט א פערזאן מיט בלוט, וואס האט נאר מער פארשטארקט די פובליק אינטערעסע און שרעק ארום דעם פאל.