בס"ד

בארא פארק: א גרופע גנבים ארעסטירט דורך די פאליציי נאכן ווערן נאכגעפאלגט דורך 'שמירה' וואלאנטירן

 

א גרופע פארדעכטיגטע גנבים וועלכע האבן זיך איינגעבראכן אין א הויז אין בארא פארק, זענען ארעסטירט געווארן דורך די פאליציי, א דאנק די פלינקע ארבעט פון די 'שמירה' ארגאניזאציע וועלכע האבן זיי נאכגעפאלגט איבער די גאסן פון די געגנט.

דער אינצידענט איז אויפגעכאפט געווארן אויף עטליכע סעקיוריטי קעמערעס, וואס האבן רעקארדירט ווי די פארברעכער גייען אריין אינעם הויז און ווי זיי פארלאזן שפעטער דעם ארט. די 'שמירה' אפעראציע צענטער האט מיטגעהאלטן די גאנצע פאסירונג און קאארדינירט מיט די מעמבערס אויפ'ן פעלד בעת די גנבים האבן זיך ארומגעדרייט אויף די ארומיגע גאסן.

ניצנדיג זייער ברייטע נעץ פון קעמערעס און פאטראל קארס, האבן די שמירה וואלאנטירן ווייטער נאכגעפאלגט די פארדעכטיגטע און איבערגעגעבן די פונקטליכע אינפארמאציע פאר די פאליציי אפיצירן וואס זענען געקומען צו לויפן צום סצענע, וועלכע האבן זיי עווענטועל ארעסטירט און אפגעפירט אין קייטן.

דער אינצידענט דינט אלס א וויכטיגע דערמאנונג פאר אלע איינוואוינער צו האלטן זייערע היימען פארזיכערט. מען זאל זיכער מאכן צו פארשליסן אלע טירן און פענסטערס, און מאכן זיכער אז די אריינגענג און אנדערע וויכטיגע ערטער ארום די הויז זענען גוט געדעקט מיט סעקיוריטי קעמערעס.