בס"ד

סקאקי, אילינוי: טראפיק לייטס ביי פארנומענע אינטערסעקשאן געטוישט צו אקאמאדירן שומרי שבת

באאמטע אין סקאקי, אילינוי, האבן געטוישט די סיסטעם פון די טראפיק לייטס ביי א פארנומענע אינטערסעקשאן אין שטאט, צו ערמעגליכן פאר די לאקאלע שומרי שבת אריבערצוגיין די גאס רואיגערהייט אן דארפן דרוקן דעם עלעקטראנישן קנעפל.

דער טויש איז דורכגעפירט געווארן ביים אינטערסעקשאן פון דעמפסטער סטריט און איסט פרעירי ראוד, וואס געפינט זיך נאנט צו עטליכע שולן און ווערט שטארק באנוצט דורך היימישע אידן און משפחות אויפ'ן וועג צו און פון שול אום שבת קודש.

ביז איצט איז דער סיסטעם געווען אז אויב מ'האט נישט געדרוקט דעם קנעפל, האט מען טאקע באקומען א צייכן אריבערצוגיין, אבער מיט פיל ווייניגער צייט. דאס האט אנגעמאכט שוועריגקייטן פאר משפחות מיט קליינע קינדער, עלטערע אידן, און מענטשן אויף רעדערשטולן, וועלכע האבן זיך געדארפט יאגן אריבערצוגיין די ברייטע גאס.

אונטער דעם נייעם סיסטעם, וועט די לייט אויטאמאטיש געבן די פולע צייט אריבערצוגיין דורכאויס שבת, אן דארפן דרוקן קיין שום קנעפל. דער אויטאמאטישער סקעדזשועל הייבט זיך אן פרייטאג נאכמיטאג און גייט אן ביז מוצאי שבת, געבנדיג ארום 60 ביז 65 סעקונדעס אריבערצוגיין, אנשטאט די געווענליכע 30 ביז 40 סעקונדעס וואס מען פלעגט באקומען אן דרוקן דעם קנעפל.

די מעיאר פון סקאקי, ען טענעס, זאגט אז זי איז געוואויר געווארן פון דעם פראבלעם נאכ'ן באזוכן א לאקאלע שול און זען ווי שווער עס איז פאר די איינוואוינער אריבערצוגיין די פארנומענע גאס. די שטאטישע באאמטע האבן דערנאך אינאיינעם מיט די אילינוי דעפארטמענט אוו טראנספארטאציע (DOT) - וועלכע קאנטראלירט די אינטערסעקשאן - אריינגעלייגט דעם נייעם אויטאמאטישן סיסטעם. דער טויש איז שוין אריין אין קראפט ענדע אפריל.

די באאמטע קוקן איצט אריין אין די מעגליכקייט צו ברענגען ענליכע אויטאמאטישע לייטס צו נאך אינטערסעקשאנס וואס ווערן באנוצט דורך די קהילה, אריינגערעכנט דעמפסטער סטריט ביי העמלין און קילער עוועניוס, און טשערטש סטריט ביי קראופארד עוועניו. ווי אויך איז דא אן אינטערעסע צו מאכן דעם זעלבן סיסטעם פאר ימים טובים.

דער טויש שטעלט צו א פראקטישע און זיכערע לעזונג פאר די שומרי שבת, ערמעגליכנדיג זיי אריבערצוגיין די גאסן רואיג און זיכער אן קיין שום חשש חילול שבת.