אומגעווענליכע סצענע: הויפט פון די מדינת ישראל שב"כ באזוכט אין חב"ד הויפטקווארטירן אין קראון הייטס

דער הויפט פון די מדינת ישראל שב"כ, דוד זיני, האט אפגעשטאט א באזוך אין די חב"ד הויפטקווארטירן אויף 770 איסטערן פארקוועי אין קראון הייטס, אין די צייט פון זיין באזוך אין ניו יארק.

דורכאויס דעם באזוך האט זיני באקוקט דעם באקאנטן 770 בנין, און זיך געטראפן מיט רבנים, בחורים און לאקאלע איינוואוינער פון די קראון הייטס קאמיוניטי.

לויט ווי עס ווערט באריכטעט דורך לאקאלע חב"ד נייעס קוועלער, האט זיני זיך אראפגעזעצט שמועסן מיט די בחורים איבער זייער טעגליכע סדר הלימוד, און האט אפגעראכטן א שמועס מיט הרב יקותיאל פעלדמאן איבער די חב"ד השקפה און תורות ארום עניני משיח. ווי אויך האט ער באזוכט דעם היסטארישן WLCC בראדקעסטינג צימער אין 770.

אין ווידעא קליפס וואס צירקולירן פונעם באזוך קען מען זען ווי זיני שטייט אינדרויסן פונעם בנין און שמועסט מיט לאקאלע איינוואוינער.

דער באזוך האט צוגעשטעלט אן אומגעווענליכע סצענע ביי איינע פון די מערסט-באקאנטע אידישע צענטערן אין ברוקלין, זעענדיג ווי דער הויכראנגיקער מדינת ישראל זיכערהייט הויפט פארברענגט צייט זיך נענטער צו באקענען מיט די קאמיוניטי און אירע מוסדות.