היסטארישע מסע הקודש: משלחת גדולי ישראל פארלאזט מעקסיקא אויפ'ן וועג קיין פאנאמא לטובת "קרן עולם התורה"

א דעלעגאציע פון גדולי ישראל האט דינסטאג פארלאזט מעקסיקא סיטי אויפ'ן וועג קיין פאנאמא, פארזעצנדיג זייער אינטערנאציאנאלע נסיעה לטובת דעם "קרן עולם התורה", נאך אן אינטענסיווע רייע פון מעמדים, תפילות און אסיפות מיט נגידים און מיטגלידער פון די ארטיגע אידישע קהילה אין מעקסיקא.

ווידעא קליפס פון מעקסיקא סיטי צייגן ווי די מאטארקאדע פון די גדולי ישראל מאכט דעם וועג צום עירפארט אונטער שווערע זיכערהייט, בעת די רבנים האבן זיך געגרייט צום קומענדיגן פאזע פון די נסיעה. לויט'ן אפיציעלן סקעדזשועל פונעם קרן, איז די דעלעגאציע אנגעקומען קיין מעקסיקא דעם 23'סטן אוגוסט, און די פאנאמא אפשטעל איז געפלאנט פארן 25'סטן אוגוסט.

די חשוב'ע משלחת רעכנט אריין הגאון ר' יעקב הלל, הגאון ר' אברהם סאלים, הגאון ר' שמעון גלאי, הגאון ר' יהושע אייכנשטיין און הגאון ר' יוסף חברוני שליט"א. דער לעיקוואודער ראש ישיבה הגאון ר' מלכיאל קאטלער שליט"א האט זיך צוגעשטעלט צו די נסיעה, אנקומענדיג פון די פאראייניגטע שטאטן.

דורכאויס זייער וויילן אין מעקסיקא סיטי, האבן די גדולי ישראל אנטיילגענומען אין א פולגעפאקטן סקעדזשועל פון מעמדים מיט'ן ציל צו פארשטארקן די שטיצע פאר'ן עולם התורה אין ארץ ישראל. צווישן די הויפט געשעענישן איז פארגעקומען א ריזיגע כינוס אין די "מגן דוד" שול וואו טויזנטער אידן האבן זיך באטייליגט, ווי אויך סליחות און שחרית אין די "כתר תורה" שול, און פריוואטע אסיפות מיט לאקאלע תומכי תורה.

די געהויבענע נסיעה קומט אין די צייט וואס "קרן עולם התורה" גייט אן מיט אירע העפטיגע אקטיוויטעטן צו ערזעצן די פאנדן וואס זענען געווארן אפגעשניטן פון די ישיבות און כוללים אין ארץ ישראל. די ארגאניזאציע גיט איבער אז זיי זענען אויסן צו שאפן ארום 12 מיליאן דאלאר א מאנאט, צו קענען אויסהאלטן די 1,489 ישיבות און כוללים וואס זענען אנגעוויזן דערויף.