שמחה און ריקודין אין עירפארט נאך די געהויבענע נסיעה פון כ"ק אדמו"ר מוויזשניץ מאנסי שליט"א קיין ארץ ישראל

א געהויבענע און פרייליכע סצענע האט זיך אפגעשפילט אינעם עירפארט, ווען הונדערטער וויזשניצער חסידים און בחורים זענען ארויס אין פייערדיגע ריקודין נאכ'ן זיך אומקערן פון א געהויבענע נסיעה אין ארץ ישראל. די נסיעה, בראשות פון כ"ק אדמו"ר מוויזשניץ מאנסי שליט"א, האט אריינגענומען א וואך צייט פון תורה, תפילה און פוקד זיין מקומות הקדושים.

די היסטארישע נסיעה האט זיך געשלאסן מיטוואך אויפדערנאכט ווען דער רבי שליט"א האט פארלאזט ארץ ישראל אויפ'ן וועג צוריק צו זיין מעון הקודש אין אמעריקע. קורץ בעפארן זיך ארויסלאזן צום בן גוריון עירפארט, איז דער רבי שליט"א אריבער צו א געזעגענונג באזוך ביי כ"ק אדמו"ר מתולדות אברהם יצחק שליט"א אין ירושלים.

די אויסערגעווענליכע נסיעה איז שוין געווען אין די פלאנירונג פאזעס פאר עטליכע חדשים, און איז ספעציעל צוגעשטעלט געווארן פאר הונדערטער בחורים וועלכע האבן זיך אויסגעצייכנט אין זייערע תורה לערנונגען. צוויי ספעציעלע טשארטער פליגערס זענען אראנזשירט געווארן צו טראגן די הונדערטער משתתפים פון אמעריקע קיין ארץ ישראל.

דער הויכפונקט פון די נסיעה איז געווען דער געהויבענער שבת וואס מען האט געפראוועט בצל הקודש אין אתרא קדישא מירון סמוך ונראה צום ציון פונעם התנא האלוקי רבי שמעון בר יוחאי. אין די טעג נאך שבת האט דער רבי שליט"א אינאיינעם מיט די חסידים פוקד געווען נאך צענדליגע מקומות הקדושים איבער'ן גליל און אנדערע שטעט.

עס איז אינטערעסאנט אנצומערקן די מאסיווע הכנות וואס זענען געמאכט געווארן בעפאר די נסיעה. די עסקנים האבן אפילו אהערגעשטעלט א ספעציעלע טשעק-אין און סעקיוריטי סטאנציע אינעם וויזשניצער ביהמ"ד הגדול אין מאנסי בעפאר'ן ארויספארן, וואס האט געגעבן די מעגליכקייט פאר די הונדערטער בחורים צו ענדיגן דעם גאנצן פראצעדור נאך בעפארן אנקומען אין עירפארט.

מיט'ן צוריקקער פונעם רבי'ן קיין אמעריקע קומט די וואכעדיגע נסיעה צו אן ענדע, איבערלאזנדיג א רושם עז ביי די הונדערטער משתתפים, וואס האט זיך ארויסגעזען מיט די פרייליכע טענץ אינעם עירפארט ביים אנקומען.