א שיסעריי אטאקע האט פאסירט יום כיפור ביינאכט אינדרויסן פונעם קאנסערוואטיווער "בני יעקב" טעמפל אין בעלוויל, אנטעריא, קאנאדע, אינדערצייט פון כל נדרי. אומגעפער 25 אידן וועלכע זענען געווען אינעווייניג האבן זיך שנעל באהאלטן ווען די שיסערייען האבן זיך געהערט און אלע זענען ב"ה ארויס אומבאשעדיגט, צוליב דעם זענען אלע תפילות פון יום כיפור געווארן אפגערופן.

די אינצידענט האט פאסירט ארום 7:00 אוונט ווען דער 29-יעריגער שיסער שאן ווארד, האט אנגעהויבן שיסן דערנעבן פון דעם טעמפל געביידע, אין רעזולטאט איז א פאליציי אפיציר וועלכער האט באוואכט דעם טעמפל פארוואונדעט געווארן, אנדערע אפיצירן אויפן סצענע האבן באלד רעאגירט און קריטיש פארוואונדעט דעם אטאקירער.

די ספעציעלע אויספארשונג איינהייט פון די אנטעריא פאליציי פארשט צו דערגיין די אפיציעל מאטיוון פון די אטאקע. אין דער זעלבער צייט האט דער קאנאדישער פרעמיער מיניסטער מארק קארני און אנטעריא פרעמיער דאג פארד שארף פארדאמט די שיסעריי.

אין רעאקציע האבן פאליציי קראפטן איבערן גאנצן פראווינץ געמאלדן פארשטערקערטע זיכערהייט און ארויסגעשיקט באוואפנטע פאטראל ביי אידישע צענטערן אין די געגנט פונעם שיסעריי.