בס"ד

אומאן: א נייע וואלאנטירן איניציאטיוו אונטערן נאמען "אומאן שלי" געגרינדעט צו העלפן די טויזנטער אידן ביים היי-יעריגן קיבוץ

א נייע וואלאנטירן איניציאטיוו האט אנגעהויבן אפערירן איבער אומאן, אין די צייט וואס די צאל אידן וואס קומען אן צום יערליכן ראש השנה קיבוץ האלט אין איין וואקסן, צו צושטעלן פראקטישע הילף פאר די פילע געסט איבער די שטאט.

דער פראיעקט, וואס ווערט אנגערופן "אומאן שלי", האט ארגאניזירט א גרויסע צאל וואלאנטירן און א רייע סערוויסעס מיט'ן ציל ארויסצוהעלפן די מאסן אידן וואס קומען אן קיין אוקריינע.

צווישן די סערוויסעס וואס זענען שוין אין קראפט, איז א פלאטע פון קליינע 'טוק-טוק' וועגעלעך וואס העלפן עלטערע און אפגעמוטשעטע אידן זיך אריבערצוכאפן פון די באסעס צו זייערע אכסניות. דאס איז ספעציעל א גרויסע הילף אויף די שווערע בערגיגע גאסן ארום די הויפט געגנטער פונעם קיבוץ. פרישע בילדער פון אומאן צייגן שוין ווי די וועגעלעך זענען אין פולן שוואונג.

די איניציאטיוו האט אויך אויפגעשטעלט א הויפטקווארטיר פאר די וואלאנטירן אויף פושקינא סטריט, פון וואו מען קען דירעקטירן די הילף צו פארשידענע געברויכן איבערן קיבוץ. אנדערע פראיעקטן רעכענען אריין הילף און ריפרעשמענט סטאנציעס, חלוקות, הילף מיט'ן מסדר זיין די ספרים אין די בתי מדרשים, און א ברייט-פארצווייגטע ריינקייט קאמפיין.

אלס טייל פון די ריינקייט אפעראציע, האבן די עסקנים איינגעקויפט 2,000 גרויסע דיספאזעבל מיסט קאסטן און זיי אויסגעשטעלט איבער גאנץ אומאן. די לאקאלע שטאטישע ארבייטער ארבעטן אינאיינעם מיט די עסקנים כסדר אויסצוליידיגן און טוישן די מיסט זעקלעך.

די פולשטענדיגע וואלאנטירן אפעראציע קומט אין די טעג וואס טויזנטער מתפללים זאמלען זיך שוין איין אין אומאן, און די הכנות גייען אן אין פולן קראפט אינעם גאנצן אומגעגנט ארום דעם ציון פון הרה"ק ר' נחמן מברסלב זי"ע לקראת דעם גרויסן יום טוב ראש השנה.