אויפ'ן פערזענליכן פארלאנג פון זקני רבני ברסלב שליט"א, האט דער אנגעזעענער שתדלן הרה"ח ר' משה דוד ניעדערמאן שליט"א אונטערגענומען פראקטישע שריט צו פארהאנדלען מיט די העכסטע פענסטער.

אין די לעצטע וואכן האט ער אפגעהאלטן עטליכע קריטישע זיצונגען מיט'ן פוילישן אויסערן מיניסטעריום און מיט הויכראנגיקע גרעניץ באאמטע, וואו עס זענען אויסגעארבעט געווארן לאגיסטישע פלענער פאר מאקסימאלע קאאפעראציע.

ביי די געשפרעכן זענען אדרעסירט געווארן די שווערע אומשטענדן פון פאריאר, ווען טייל רייזענדע האבן געמוזט ווארטן לאנגע שעות אין רעגן און קעלט צוליב א מאנגל אין גרעניץ פערסאנאל.

די פוילישע רעגירונגס באאמטע האבן זיך אנטשולדיגט דערויף, און קלארגעשטעלט אז זיי האבן ארויסגענומען די ריכטיגע לעקציעס מיט די פולסטע ערנסטקייט.

וויבאלד דער הויפט גרעניץ אריבערגאנג 'מעדיקא' (קיין לעמבערג) וועט זיין מערסטנס פארשפארט פאר באסעס צוליב שווערע איבערבוי ארבעט, האט די רעגירונג באשלאסן צו באשטימען אלטערנאטיווע גרעניצן און אינגאנצן פארדאפלען די צאל גרעניץ וועכטער ביי די פונקטן.

אפיציעלע מעלדונגען איבער די גענויע לאקאציעס וועלן נאכפאלגן אין די קומענדיגע טעג.

ר' משה דוד ניעדערמאן ארבעט גאר אינטענסיוו אויף דער אוקריינישער זייט, כדי צוזאמצוברענגען די אוקריינישע און פוילישע באאמטע צו א געמיינזאמע און פולקאמע קאאפעראציע.

די געשפרעכן מאכן יעצט גוטע פארשריט, מיטן ציל אז די אריבערגענג זאלן פונקציאנירן שנעל, גלאט, און אן קיין אומנויטיגע פארהאלטונגען פון ביידע זייטן.

א וויכטיגע ווארענונג פאר די רייזנדע

די פוילישע רעגירונג און קאסטומס באאמטע האבן ספעציעל באטאנט ווי קריטיש וויכטיג עס איז אז דער ציבור זאל זיך שטרענג האלטן צו אלע פוילישע רעגולאציעס (קאסטומס).

מען בעט די רייזנדע זיך אפצוהיטן פון אריבערפירן סיי וואספארא פארבאטענע זאכן; וויבאלד אפילו איין קליינער אינצידענט קען פארהאלטן דעם גאנצן סיסטעם.

אזעלכע פארהאלטונגען פאראורזאכן לאנגע צייטן פון ווארטן און גרויס עגמת נפש פאר טויזנטער אנדערע אידן וואס ווארטן אין די רייעס.

מיט די ברייטע לאגיסטישע צוגרייטונגען האפט מען אז דער דורכגאנג צום גרויסן ראש השנה קיבוץ וועט דאס יאר בעזרת השם זיין פיל מער פליסיג, רואיג, און מסודר'דיג.