א ווארעמע און הארציגע סצענע איז דאקומענטירט געווארן אין ירושלים עיה"ק באלד נאכן אויספאסטן, ווען עס איז פארטיילט געווארן פרישע הייסע זופ אינעם היסטארישן 'בית התניא' שול אין הארץ פון די מאה שערים געגנט.

אין א ווידעא וואס איז ארויסגעלייגט געווארן דורך יענקעלע קארנבליט, קען מען זען ווי דער באקאנטער עסקן ר' הערשל חנון טיילט אויס טעלערס מיט הייסע זופ פאר די מתפללים און אנוועזנדע אין שול מוצאי תענית, צו דערכאפן דאס הארץ נאכן פאסטן.

ר' הערשל איז שטארק פארבונדן מיטן בית התניא שול, און דינט שוין פאר א לאנגע צייט אלס דער איבערגעגעבענער גבאי פונעם מקום קדוש. דער שול איז שוין לאנג באקאנט אלס א פלאץ וואס טיילט אויס אומזיסטע מאלצייטן פאר אידן וואס נויטיגן זיך דערין.

די פשוט'ע אבער הערליכע סצענע מוצאי תענית האט געגעבן א קליינעם אריינבליק אין די טעגליכע חסד אקטן וואס קומען פאר אונטער די קוליסן אין די מאה שערים געסלעך.