בס"ד

נייע דעטאלן: דער קא-פיילאט אויפ'ן 'פליי-דובאי' פליגער האט געפלאנט א טעראר אטאקע אינעם בן גוריון עירפארט

נייע דעטאלן וואס זענען ארויסגעקומען פון די אויספארשונג איבער די געפרואווטע טעראר אטאקע אויף די 'פליי-דובאי' פלייט FZ1073 צייגן, אז דער קא-פיילאט האט שוין געהאט אויסגעפלאנט די אטאקע נאך בעפאר ער איז אויפגענומען געווארן דורך די עירליין, און זיין הויפט ציל איז געווען צו קראכן דעם פליגער דירעקט אינעם בן גוריון עירפארט אין ארץ ישראל.

צוויי מדינת ישראל באאמטע וועלכע זענען באקאנט מיט די אויספארשונג האבן איבערגעגעבן פאר די 'רויטערס' נייעס אגענטור, אז דער קא-פיילאט האט זיך מודה געווען פאר די אויספארשער אין די פאראייניגטע אראבישע עמיראטן (UAE) אז ער האט געפלאנט די אטאקע נאך בעפאר ער האט אנגעהויבן ארבעטן פאר פליי-דובאי. א דריטער קוואל האט באשטעטיגט אז דער בן גוריון עירפארט איז געווען דער ציל פונעם קראך.

לויט די באריכטן, האט דער קא-פיילאט שוין פריער דעם יאר געפירט אן אנדערע פלייט קיין תל אביב, און ער האט דעמאלטס אויך געקלערט פון היידזשעקן און קראכן יענעם פליגער, אבער צום סוף האט ער אפגעלאזט דעם פלאן. די סיבה פארוואס ער האט זיך דעמאלטס צוריקגעצויגן איז דערווייל נישט קלאר.

די נייע אנטפלעקונגען קומען נאך דעם שוידערליכן אינצידענט וואס האט פאסירט דעם 30'סטן סעפטעמבער אויף פלייט FZ1073 פון דובאי קיין תל אביב. די עמיראטן אינסטאנצן האבן איבערגעגעבן אז אינמיטן וועג האט דער קא-פיילאט אטאקירט דעם הויפט פיילאט מיט א האק וואס ליגט אינעם קאקפיט פאר עמערדזשענסיס, און האט פרובירט איבערצונעמען קאנטראל פונעם פליגער. פאסאזשירן און מאנשאפט מיטגלידער האבן זיך אריינגעמישט און אים באוויזן צו איבערקומען, און א רעזערוו פיילאט פון פליי-דובאי האט עווענטועל געלאנדעט דעם פליגער בשלום אין סאודי אראביע.

דער הויפט פראקוראר אין די עמיראטן האט אפיציעל דערקלערט דעם אינצידענט אלס א געפרואווטע טעראר אטאקע. די אויספארשונג איבער די מאטיוון פונעם פארדעכטיגטן, און צו נאך אנדערע זענען געווען פארמישט אינעם פלאן, גייט נאך אן אין די יעצטיגע טעג.