בס"ד

שטורעם אין ארץ ישראל: אפיציעלע פעטיציע אריינגעגעבן אפצושטעלן די 'שקל הטהור' חלוקה פון 200 דאלאר פאר משפחות וואס שטימען נישט אין די בחירות

א ריזיגע פינאנציעלע פראיעקט, געשטיצט דורך סאטמאר, גרייט זיך אויסצוטיילן 200 דאלאר'דיגע מענק פאר חרדי'שע משפחות אין ארץ ישראל וועלכע נעמען זיך אונטער נישט צו אנטיילנעמען אין די קומענדיגע כנסת בחירות. דאס קומט אבער אין די זעלבע צייט וואס א דרינגענדע פעטיציע איז אריינגעגעבן געווארן צו די אינסטאנצן מיט א ציל אפצושטעלן די חלוקה.

די פראיעקט ווערט אנגעפירט דורך די באקאנטע קאסע פון 'שקל הטהור'. לויט די פלאן גייען טויזנטער משפחות געניסן פון די געלטער, וואס קומט אויס צו אסטראנאמישע סומעס פון מיליאנען שקלים וואס איז צוזאמגעשטעלט געווארן דורך נדבנים פון חוץ לארץ. 

לויט די באריכטן, זענען די משפחות וואס זענען אריינגערעכנט אין די אינערליכע ליסטעס - באקאנט אלס די "רשימות הטהורות" - בארעכטיגט צו באקומען א טשעק פון 200 דאלאר, אבער בלויז בתנאי אז קיינער פון די שטוב גייט נישט ארויס שטימען אין די קומענדיגע וואלן.

די חלוקה איז הויפטזעכטליך געצילט פאר משפחות וואס זענען אנגעשלאסן אין סאטמאר, די עדה החרדית, און אנדערע קהילות וואס גייען בשיטה נישט צו די בחירות. כאטש עס זענען געווען באריכטן אין די לאקאלע מידיא אז די חלוקה זאל זיך אנהייבן דאנערשטאג ביינאכט, איז נאך דערווייל נישט קלאר די פונקטליכע סקעדזשועל ווען די געלטער גייען פאקטיש אויסגעטיילט ווערן, און עס איז נישט דא קיין באשטעטיגונג אז די טויזנטער משפחות האבן שוין עקשעלי באקומען באצאלט.

'שקל הטהור' אליינס איז שוין אן אלטע פאנד וואס עקזיסטירט שוין יארן לאנג. די קאסע טיילט שוין יארן לאנג מיליאנען דאלארן פאר מוסדות התורה אין ארץ ישראל וואס נעמען נישט קיין געלט פון די גאווערנמענט.

אינצווישן האט די איצטיגע פראיעקט ארויסגערופן א לעגאלע שטורעם. א דרינגענדע פעטיציע איז אריינגעגעבן געווארן צום פארזיצער פון די צענטראלע וואלן קאמיטעט פאר די 26'סטע כנסת, מיט א פארלאנג ארויסצוגעבן א צייטווייליגע צוואנגס-פארבאט (אינדזשאנקשען) אפצושטעלן די חלוקה. 

די לעגאלע דאקומענט דערמאנט סאטמאר און 'שקל הטהור', און טענה'ט אז מען טיילט פינאנציעלע הילף אלס א דירעקטע באלוינונג פאר'ן נישט שטימען, און פארלאנגט אז מען זאל דאס תיכף אפשטעלן. 

מען דארף אבער אונטערשטרייכן אז דאס זענען בלויז טענות פון די וואס האבן אריינגעגעבן די פעטיציע, און דערווייל האט די קאמיטעט נאך נישט ארויסגעגעבן קיין שום אפיציעלע פסק אדער פארבאט קעגן די חלוקה. די לעגאלע פראצעדור קומט אין א צייט וואס די 'שקל הטהור' פראיעקט ריקט זיך פאראויס מיט א ריזיגע פארנעם.