שפאנונג אין ארץ ישראל: צוויי בני ישיבות ארעסטירט אין אילת; הפלג הירושלמי ווארנט מיט מאסיווע פראטעסטן

ארץ ישראל — די אנגעצויגנקייט ארום די ארעסטן פון בני ישיבות האט זיך שטארק פארמערט דעם דינסטאג, נאכדעם וואס צוויי יונגעלייט זענען פארהאלטן געווארן אין די שטאט אילת און איבערגעגעבן געווארן צו די מיליטערישע פאליציי. דאס האט געפירט דערצו אז די 'פלג הירושלמי' זאל ארויסקומען מיט א שארפע ווארענונג איבער גרויסע פראטעסטן אויב די ארעסטירטע ווערן נישט באלד באפרייט.

איינער פון די ארעסטירטע איז אידענטיפיצירט געווארן אלס יקיר ראלבאג, א תלמיד פון ישיבת חברון-כנסת ישראל. ער איז פארהאלטן געווארן אין אילת בעפאר מען האט אים איבערגעגעבן פאר די מיליטערישע פאליציי.

דער צווייטער פארהאלטענער איז א פרישער אינגערמאן פון ירושלים, וועלכער איז ארעסטירט געווארן אינמיטן א באזוך אין אילת אינאיינעם מיט זיין פאמיליע, און איז אויך אריבערגעפירט געווארן צו די הענט פון די מיליטערישע פאליציי.

די פרישע ארעסטן קומען אין א צייט וואס דאס מיליטער פלאנירט צו באנייען זייערע אפעראציעס קעגן חרדי'שע יונגעלייט וואס שטעלן זיך נישט צום מיליטער. מיליטערישע באאמטע האבן אנגעוויזן אז די אקטיווע אפעראציעס אויפצוזוכן און ארעסטירן די וואס קומען זיך נישט שטעלן, וועט זיך צוריק אנהייבן אין לויף פון חודש אקטאבער, נאך א קורצע פויזע וואס זיי האבן גענומען דורכאויס די ימים טובים.

אין די לעצטערע תקופה האבן די מיליטערישע פאליציי זיך בעיקר קאנצענטרירט ביי די גרעניצן און לופטפעלדער, וואו איבער 200 זענען פארהאלטן געווארן דורכאויס דעם חודש סעפטעמבער, אריינגערעכנט איבער 160 חרדי'שע אידן.

די נייע ארעסטן האבן ארויסגערופן א שארפע רעאקציע פונעם 'פלג הירושלמי', וועלכע גרייטן זיך יעצט פאר מאסיווע דעמאנסטראציעס און מעגליכע בלאקאדעס אויף די גאסן און הייוועיס אויב די פארהאלטענע ווערן נישט באפרייט.

דאס קומט אין צוגאב צו די שוין-אזוי-אויך אנגעצויגענע אטמאספערע נאך אן אומגעלונגענע ארעסט פארזוך אין מודיעין עילית, וואו א ריזיגער ציבור האט זיך פארזאמלט נאכדעם וואס די נייעס האט זיך פארשפרייט אז די מיליטערישע פאליציי איז אנגעקומען ארעסטירן א ישיבה בחור. יענע אינצידענט האט זיך ענדליך געענדיגט אן דעם וואס דער בחור זאל ארעסטירט ווערן.

יעצט, מיט די ערווארטונג אז די מיליטער וועט צוריק אנהייבן מיט זייערע אגרעסיווע ארעסטן, קענען די לעצטע אנטוויקלונגען פירן צו א פרישע כוואליע פון שטורמישע פראטעסטן איבער די גאנצע לאנד איבער דעם ענין פון ארעסטירן בני ישיבות.