שוידערליכער עקסידענט אין ירושלים: פרוי קריטיש פארוואונדעט נאכדעם וואס א מיניבאס האט אריינגעקראכט אין א געשעפט נעבן מחנה יהודה

א פרוי אין די 30'ער יארן איז דאנערשטאג אינדערפרי קריטיש פארוואונדעט געווארן, נאכדעם וואס א מיניבאס האט איר אראפגעקלאפט און אריינגעקראכט אין א געשעפט אויף אגריפס סטריט אין ירושלים, הארט נעבן דעם פארנומענעם מחנה יהודה מארק.

דער עקסידענט האט פאסירט ארום 9:05 אינדערפרי, ווען דער מיניבאס האט לויט באריכטן פארלוירן קאנטראל, ארויפגעפארן אויפן סיידוואק, און אראפגעקלאפט די פרוי בעת'ן אריינקראכן אינעם געשעפט.

עמערדזשענסי פערסאנאל פון מגן דוד אדום און איחוד הצלה זענען תיכף אראפגערופן געווארן צום סצענע, וואו זיי האבן געטראפן די פרוי מיט גאר שווערע וואונדן. די רעטונגס ארבייטער האבן גלייך אנגעהויבן צו געבן לעבנס-רעטנדע באהאנדלונגען, אריינגערעכנט CPR. די פרוי איז אפגעפירט געווארן צום שערי צדק שפיטאל אין א קריטישן צושטאנד, אינדערצייט וואס די רעטונגס-פרואוון האבן נאך אנגעהאלטן אויפ'ן וועג.

פאליציי אפיצירן זענען אנגעקומען אויפ'ן ארט, אפגעשפארט די גאנצע ארומיגע געגנט, און אנגעהויבן אן אויספארשונג איבער די אומשטענדן פונעם קראך. דער דרייווער פונעם מיניבאס איז פארהאלטן געווארן פאר אויספארשונג, בשעת טראפיק אינוועסטיגעיטארס ארבעטן צו דערגיין וואס האט געפירט דערצו אז דער קאר זאל אראפפארן פונעם ראוד.

בילדער פונעם סצענע צייגן ווי דער מיניבאס שטעקט אינעם צובראכענעם פראנט פונעם געשעפט, ארומגענומען מיט עמערדזשענסי רעספאנדערס און פאליציי. שטיקער פונעם בנין און סחורה פונעם געשעפט זענען געווען צעווארפן איבערן גאנצן סיידוואק.

דער עקסידענט האט אנגעמאכט א שווערע טראפיק און כאאס אויף אגריפס סטריט, וואס איז א גאר פארנומענע קאמערציאלע געגנט נעבן מחנה יהודה. די פאליציי פארשט ווייטער אויס די גענויע אומשטענדן פונעם קראך.