מתפללים הייבן שוין אן זיך צו פארזאמלען ביים ציון הקדוש פון הרה"ק ר' נחמן מברסלב זי"ע אין אומאן, אין די צייט וואס די הכנות צום גרויסן יום טוב גייען אן אין פולן שוואונג.

פרישע בילדער און ווידעאוס פון אומאן צייגן ווי גרופעס פון חסידים זיצן שוין אינעם גרויסן היכל הציון, ווי זיי זענען עוסק בתורה ובתפילה. דאס קומט אין די צייט וואס די צאל באזוכער וואס קומען אן אין די אוקראינישע שטאט צום יערליכן 'קיבוץ' אויף ראש השנה וואקסט פון טאג צו טאג.

טויזנטער אידן געפינען זיך שוין יעצט אין אומאן, און עס ווערט ערווארטעט אז נאך פילע טויזנטער וועלן אנקומען אין די קומענדיגע טעג וואס זענען געבליבן ביז ראש השנה.

איבער די גאנצע געגנט ארום דעם ציון קומען פאר מאסיווע הכנות און צוגרייטונגען אויפצונעמען די ריזיגע מאסן אידן וואס קומען זיך צוזאם פון איבער דער גארער וועלט צו פראווען דעם יום טוב.