המקובל הגאון ר' יעקב עדס שליט"א פראוועט ספעציעלע תפילה ביים כותל המערבי לביטול גזירת הגיוס

נאך א גרויסע מעמד סליחות וואו טויזנטער אידן האבן זיך באטייליגט, האט המקובל הגאון ר' יעקב עדס שליט"א געפירט א ספעציעלע תפילה ביים כותל המערבי צו פועל'ן א ביטול אויף די שרעקליכע גזירת הגיוס.

אין א ווידעא וואס איז פארשפרייט געווארן, זעהט מען ווי ר' יעקב עדס שטייט נעבן כותל מיט א קלענערע גרופע מתפללים, נאכדעם וואס דער גרויסער ציבור איז שוין אהיים. לויט די באריכטן, איז די גרופע פארבליבן אויפ'ן ארט פאר א ספעציעלע תפילה און התעוררות איבער די אנגייענדע גיוס קריזיס וואס שוועבט העכער די קעפ פון די בני הישיבות.

די תפילה איז פארגעקומען מוצאי שבת, דעם 22'סטן אוגוסט, נאך די צענטראלע סליחות וואס קומט פאר יעדע נאכט אין חודש אלול ביים שריד בית מקדשנו.

דער באקאנטער מקובל האט שוין עטליכע מאל שארף ארויסגעטרעטן קעגן די פלענער צו אריינציען ישיבה בחורים אין מיליטער. ביי פריערדיגע פארזאמלונגען איבער די גיוס פראבלעם, האט ר' יעקב עדס שטארק ארויסגעברענגט אז אינאיינעם מיט די השתדלות און עסקנות קעגן די גזירה, מוז כלל ישראל מרבה זיין בתפילה און איינרייסן רחמי שמים צו באשיצן דעם עולם התורה.

די יעצטיגע מעמד תפילה ביים כותל קומט אין א צייט פון פרישע אנגעצויגנקייט איבער דעם סטאטוס פון בני הישיבות אין ארץ ישראל. אין די לעצטע טעג זענען פארגעקומען עטליכע ארעסטן פון ישיבה בחורים איבער זייער מיליטער סטאטוס, וואס האט געפירט צו פראטעסטן און א שטארקע זארג איבער די גאנצע חרדי'שע גאס.