ראחמיסטריווקא: די לאקאציע פאר די גרויסע בר מצוה פון אן אייניקל פון כ''ק  אדמו"ר מראחמיסטריווקא שליט''א האט זיך געטוישט, נאכדעם וואס עס איז קודם פלאנירט געווארן צו פארקומען אינעם ביהמ"ד הגדול פון קארלין סטאלין אין גבעת זאב און איז אפגערופן געווארן לעת עתה.

דאראג: צום ערשטן מאל אין איר 30 יעריגע היסטאריע, האבן חסידי דאראג געעפנט א נייע קהילה אינדרויסן פון בני ברק אינעם יישוב עמנואל, וואו דער רבי האט די וואך אפגעשטאט א באזוך צו די איבעראשונג פון די חסידים.

צאנז: כ"ק אדמו"ר מצאנז שליט"א קומט היינט אן קיין צפת, אויפצונעמען קהל חסידיו לקראת די ימי הרחמים והרצון אין זיין בית המדרש אויף רחוב תרפ"ט בעיר העתיקה.

סאדיגורא: כ"ק אדמו"ר מסאדיגורא שליט"א קומט היינט אוונט אן קיין ביתר עילית צו זיין בית המדרש אויף רחוב קדושת לוי, אויפצונעמען די חסידים לקראת אלול.

שמחות

שמחת הברית אין זוועהיל: כ''ק אדמו"ר מזוועהיל שליט"א האט געפראוועט די ברית פון זיין 13'טן זון. דער לאצק'ער רבי איז מכובד געווארן מיט סנדקאות. מען האט א נאמען געגעבן דעם קינד 'חי יצחק', נאך כ''ק אדמו"ר מראחמיסטריווקא זצ"ל.

שמחת החתונה בבית ספינקא - סאטמאר: היינט נאכט קומט פאר אין זאל 'פאראנד' אין בית שמש די חתונה פון אן אור אייניקל פונעם כ''ק אדמו''ר מספינקא ירושלים זצ"ל (אייניקל פונעם עסקן ר' אפרים שטערן), מיט אן אייניקל פון אב"ד סאטמאר ירושלים שליט"א (מהר"א).

הכנסת ספר תורה אין באבוב: דעם שבת אינדערפרי איז פארגעקומען א גרויסע הכנסת ספר תורה אריינגעגעבן צום באבוב'ן בית המדרש אויף רחוב חבקוק 19 אין בני ברק.

זקוקים לרחמי שמים

ביאלא אסטרובא: דער ציבור ווערט געבעטן צו מתפלל זיין פאר כ"ק אדמו"ר מביאלא אוסטרובא שליט"א (ברודער פונעם ביאלא ב"ב רבי'ן), כ''ק הרה"צ אברהם ירחמיאל בן הרבנית שרה רבקה.