באהאלטן אינעם טראנק:

די גרעניץ פאליציי ביי א טשעקפוינט אין ירושלים האבן אנטדעקט אן אומלעגאלן אריינדרינגער וואס האט זיך באהאלטן אין א ספעציעל געבויטן באהעלטעניש אינעם טראנק פון א קאר.

דער מענטש איז פארהאלטן געווארן, און פאליציי האט אויך ארעסטירט דעם דרייווער, א 34 יעריגער איינוואוינער פון מזרח ירושלים.

"מיר שפירן זיך פארראטן":

חרדי'שע סאלדאטן וואס האבן זיך אנגעשלאסן מיט כמעט צוויי יאר צוריק אין די חרדי'שע "תומר" אפטיילונג (פון די 'גבעתי' בריגאדע), האבן איבערגעגעבן אז די אפטיילונג איז פארמאכט געווארן און מען האט זיי איבערגעפירט צו א רעגולערע אפטיילונג אין עזה.

אלס רעזולטאט, קענען זיי מער נישט אנהאלטן זייער חרדי'שן לעבנסשטייגער, וואס דאס איז געווען א קלארע צוזאג ווען זיי האבן זיך אנגעשלאסן אינעם מיליטער.

צה"ל פאזיציעס אין סיריע:

די מדינת ישראל מיליטער האט אין די לעצטע חדשים אויפגעשטעלט 9 נייע מיליטערישע פאזיציעס טיף אריין אין די סירישע טעריטאריע. דריי פון די פאזיציעס ווערן יעצט אנגעפירט דורך רעזערוו באטאליאן 9308.

דער קאמאנדיר פונעם באטאליאן האט ארויסגעברענגט אז אנדערש ווי ביים לבנון גרעניץ וואו מען ווייסט קלאר ווער דער פיינט איז, איז דא די שוועריגקייט אז מען דארף אפערירן צווישן ציווילע בירגער אינעווייניג אין די דערפער.

די מיליטער האלט אן א גוטע קאנטאקט מיט די ארטיגע ציווילע איינוואוינער (דרוזן און סוני מוסולמענער) דורך ספעציעלע אפיצירן.

טראגעדיע ביים ירדן טייך:

דאס חרדי'שע קינד וואס איז פארשוואונדן געווארן אינעם ירדן טייך (נעבן 'יסוד המעלה') נאכדעם וואס זיין שיפל האט זיך איבערגעדרייט, איז ליידער געפונען געווארן אן קיין צייכנס פון לעבן נאך לאנגע שעות פון זוכענישן דורך די פאליציי און רעטונג-כוחות. די גענויע אומשטענדן פונעם אינצידענט ווערן יעצט אויסגעפארשט.

זוכענישן נאך א בחור:

גרויסע הצלה כוחות זוכן יעצט אינעם ירדן טייך נאך א בחור וואס איז פארשוואונדן געווארן, נאכדעם וואס זיין שיפל האט זיך איבערגעדרייט אין וואסער.

שומרים מיטינג איבער אומלעגאלע טעקסיס:

 די וויליאמסבורג שומרים האט אפגעהאלטן א וויכטיגע זיצונג אין זייער הויפט קווארטיר מיט קאמאנדירן פון די 90'סטע און 79'סטע פאליציי פריסינקטס, אינאיינעם מיט'ן קאמישינער און העכסטע באאמטע פון די שטאטישע טעקסי קאמיסיע. מען האט דורכגעטון און ארומגערעדט די פראבלעמען מיט אומלעגאלע טעקסיס אין און ארום די געגנט.

באבוב-45 שבת אין טשעסטער:

כ"ק אדמו"ר מבאבוב-45 שליט"א האט אפגעראכטן דעם שבת אויף א פריוואטע פארנעם אין טשעסטער, וואו ער האט געפראוועט די תפילות אין ביהמ"ד בית יוסף מרדכי.

פאר'ן בענטשן האט דער רבי דערציילט סיפורים פונעם סאטמארער רב זי"ע, לרגל די יארצייט וואס געפאלט היינט, כ"ו אב.